聖誕鳳凰之旅 Day 1

(我地唔係去肇慶架，係去凰鳳)

嘩哈哈！我等左好耐既聖誕鳳凰之旅今日終於都出發。約左Sam放工向地鐵站等，之後就一齊搭車上深圳等。本來諗住上到深圳應該仲有時間食飯，點知原來佢地買早左一班火車去廣州！其實之前我地黎既時候，小三已經打黎話會趕唔切！唉.......好耐都無見過小三啦！今次又無機會。因為無時間食飯所以求期向三島買左個楊州炒飯拎上火車食就算。上到火車已經無晒位，所以只好企向度食啦！好彩過左一個站之後就有位坐！呵呵！到左廣州之後仲要轉另外一班火車去懷化。就向呢個時候，我收到小公主越洋打來的電話，哈哈！我講過之後比左大叔講，之後就Sam同Jackie。雖然係長途會好貴，不過唔緊要啦！上到火車都未眼訓，所以大家咪圍理一齊傾計，傾到成點幾鐘先捨得訓。

在香港第一個聖誕派對

今晚又去左TL既朋友屋企參加聖誕派對。五點半就約左Sam向美孚等！之後就一齊搭西鐵去錦上路，等齊人就再坐私家車入去Roland屋企！原來有成三十人一齊開派對！入到去，我地幾個女仔就幫手整野食。點知未整完，出面既人已經偷食晒！好彩我地自己向入面都偷食左唔少！其實除左我地整既小食之外都仲有其他野食。食完野就大家一齊玩遊戲！玩過遊戲，又到交換禮物既時間。交換完禮物都差不多成十一點幾！又要麻煩屋主車返我地出西鐵站搭車！
今次我抽到亞Ken既泰國手信！可愛既牙刷架！

12/23-27 超好玩的聖誕鳳凰之旅

哈哈！我返黎喇~~~~~五日既聖誕旅行話咁快就完！雖然呢五日既天氣非常唔好，成日都好大霧，仲落雨黎！所以都無乜影到相！但都無損旅行既興緻。第一次去旅行係唔需要趕頭趕命(除左最尾要趕火車)，可以試到hae向Cafe一邊嘆coffee一邊寫遊記！個感覺好舒服。第一次玩"killer"，好好玩！差不多玩足咁多晚。今次旅行無一晚係可以早過零晨一點訓，晚晚都玩到差不多三點幾四點至訓。但第二朝又有精神繼續玩，只能比一個字自己---勁！總之今次旅行超好玩！

唔覺唔覺呢個聖誕旅行又去完，五日既時間過得好快，而且仲好開心。今次呢個trip除左好玩同好笑之外，我仲識多左好多新朋友，而且之後大家仲有keep住出黎玩添！雖然今次天氣實左麻麻(基本上係無一日係好天過，仲要落雨添！)所以都無乜影相。但就比我發現一樣野，原來去旅行除左地方風景同天氣之外，同行既人都好緊要，就算天氣真係唔好，風景一D都唔優美，只要同行既人係夾既話，原來都可以好好玩。今次就係一次最好既証明！

謝謝Sam，Kitty媽，乖仔，大叔同bowu給我一個難忘既聖誕節！

好好玩既War Game

       

想玩War Game已經想左好耐！但次次都玩唔到。今次終於有機會啦！今次又跟左TL既朋友仔去玩War Game。一朝日九點鐘就約左Sam向西鐵站等，之後就去錦上路Join Billy 車入"戰谷"(即係我地玩War Game既地方。嘩！原來入面已經有好多人，仲有好多都係勁人，好彩我地真係自己圍內既人玩，如果同埋佢地一齊玩就死火。首先我地一個個排隊去拎衫同裝備，換完衫之後，就出去一齊聽亞Sir既講解點樣用支槍。上完堂就出發去第一個場玩，第一個場就係室內場。首先佢將我地分成兩組，每人一邊各自攻過對方既地方。可能係第一次玩，入到場就已經好驚，唔敢四圍走，只敢企死一個位射。所以好快就死左。我地斷斷續續都係呢個場玩左四次。之後就放食飯，休息左一齊，就玩第二個場，呢次係向戶外既！今次就玩攻防戰，每組輪住攻防，今次就好少少，自己敢走動下，但都好快就死！最好玩就係最尾向草叢入面，一樣係玩攻防戰！但今次因為有草叢作保護，所以好刺激。今次就夠膽四圍走去射人，呵呵勁好玩！玩完出黎先知自己玩到手指流血。而且身上仲有多處傷口添呀！陰公！   
        

森記生日K派對

露營完後我地就出旺角去唱K。因為生日前後五日都可以免生日個位既人頭費。所以我地先知原來Sam下星期生日。所以就當同壽星女提早慶祝生日！第一次同佢地唱K。估唔到大家都唱得兩咀！由其事Jackie呀下！每首歌都唱得非常認真！做和音時又非常攪笑！到我地差不多諗住走架時候，佢地突然拎左個蛋糕同支香檳入黎！有免費蛋糕同香檳就唔好浪費啦！食埋至走！
向呢度就祝森記生日快樂，心想事成啦！

私攪睇星團

哈哈！講左好耐既私攪睇星團終於都攪到成！私攪團成員有(我，Sam，eeyoyo，小林子，Jackie同bbop)。本來就約左3點向西貢等既，點知最後所有人出晒旺角，咁就一齊向旺角搭小巴入西貢喇！本來大家都係諗住去黃石碼頭搭船入灣仔既！點知Jackie一路都話要行入去，開頭就以為佢鐘意行山先咁講姐，後尾諗諗下先記得Jackie忌水唔搭船喎！開頭佢死都唔肯搭船架！但我地話行入去就會好晏而且拎住咁重野行入去會好辛苦，最後經我地既游說，佢地肯搭船。入到西貢都已經四點拿拿淋買完野就即刻搭船去黃石，再駁船入灣仔！入到去都已經有好多人，我地就決定去入D既營地。放低D野就開始set營。之後四個就落去下面洗野，我就同Jackie留向度等。呢個時候老師Jackie就拎個星圖出黎教我睇星。哈哈！今次我學識左睇牛郎織女星，天馬星，北斗七星。睇左一陣星就開始BBQ，當我地燒得興起時，突然間有隻牛牛走理偷左我地條麵包。呀！我地既早餐呀！燒到差不多就入營玩UNO，玩玩下UNO又攪到變左玩拍短片。玩到點半大家都決定訓，五點鐘再起身出黎睇星。我地六個人，兩個營，所以分開三個人一個營。我就同Jackie同bbop一齊。本來好眼訓既我，入到營就已經訓唔著，仲要比佢地兩個既鼻寒嘈到訓唔到覺。到左五點鐘就出左去睇星。可惜太多雲喇！乜都睇唔到。睇到六點幾又入營再訓過。以為今次有覺好訓，點知...............最後我要等到真係天光，佢地訓醒我至有得訓，真可憐！訓到十點半起身就食早餐。之後影下相，hae下，十二點鐘就出發由灣仔行去海下。去到海下個沙灘。我地又走左落下玩左一陣水。之後就搭車出西貢食lunch。點知講講下又話不如出旺角唱K。呵呵大家又同意囉！食飽就即刻搭車出旺角！

扮後生去踩冰

上一次踩冰已經係讀緊中三既事，都差不多有成十幾年囉！今日我又再次踏足呢個溜冰場。今次得我，亞琳同表表三個人，咁耐無踩過都唔知仲記唔記得點踩，唔知洗唔洗再重新學過呢？呵呵~~~好彩仲記得點踩，只不過係間中要扶住個邊。但已經比我中三個年有進步！成個場都係十幾歲既o靚仔同o靚女，間中就有D爸爸同媽媽陪小朋友黎玩，我諗除左佢地之外，年紀最大既都應該係我地幾個，唉........不過唔知係咪好耐無踩！踩左一齊隻腳就開始痛！所以踩在個幾鐘就走。(其實係因為仲有下場就真！哈哈！)