哎老豆八十大壽

                     

        

話說28號就係老豆生日，咁我地呢D做女既。就當然要同佢擺大壽啦！就係咁我地就決定向Neway City同攪返個生日會。放工先約Vicky到旺角等，順便陪佢配眼鏡。之後等埋老豆同大叔，再約埋二家姐向門口等，我地一行五人先去拎房，唱左一陣大家姐同森都到喇！生日又點會無生日蛋糕同禮物呢！大家姐買既蛋糕好好味！唔知係咪大家越晚越精神呢，越唱就越唔願走，大家姐呢就越夜越high。最後唱到成零晨四點幾至走，加陣諗起都痴痴地既！

復活節台中單車之旅 Day 1

(上機出發去台中喇)
今日一朝日就起身喇，因為又跟TL去旅行嘛。約左十一點向機場等，為怕遲到，所以十點半就已經到左。陸陸續續等埋其他朋友仔，check in過後就即刻去食返個Burger King先啦！終於都到上機既時間。台中我黎喇~~~~~~
一個鐘頭之後就到達台中機場。呢個時候，我地民宿既老闆娘已經向出面等緊我地。之後就出發去我地今次旅程既第一個目的地---鰲峰山市鎮公園。我地向公園四圍行下影下相。

(今日第一個目的地---鰲峰山鎮公園)

(在公園內行逛)

(火車軌前禁止通行)

(咁都比我影到架火車)
之後，我地就去左清水紫雲巖，可能我對寺廟無乜興趣，所以我同Vicky就去左附近四圍行下。行到咁上下，老闆娘就帶我地去左食呢度出名既太陽餅。最後餅店老闆仲送左兩盒比我地添。到左食晚飯既時間。老闆娘就帶左我地去食當地清水鎮既美食--竹筒米糕，其實米糕即係蒸糯米飯上面再加上豬肉。咪睇佢好似細細舊，但食落都幾溜。

(台中縣既街道)

(清水紫雲巖的門口)

(是日晚餐---竹筒米糕)
食完飯，老闆娘仲帶我地去附近既書店嘆咖啡添！我地就向邊hea下，吹下水，睇下CD。咁又過左個幾鐘。返到民宿諗住沖完涼就去訓架啦！點知，同房既五個八婆加一個八公，就係咁向間房開八婆大會至零晨三點幾。唉......第二朝仲要起身踩單車架！

(在書店hea住嘆咖啡)

好累但又玩的台中單車之旅

返黎喇~~~~~四日既復活節假咁就過完。呢次台中之旅超好玩，第一次要踩架雙腳唔到地既單車，第一次去旅行踩單車就要踩馬路，第一次連續兩日都踩單車，雖然隻腳撞到瘀晒。但都係值得既！今次又再次晚晚玩到零晨兩三點至訓，但就係因為咁我又識多一班新朋友。hehe~~~

謝謝Vicky同大公主沿路照顧！

四日既台中單車之旅話咁快就完左，第一次去旅行踩單車，發覺自己都真係唔講係踩得好得，如果下次再有機會去旅行踩單車的話，事前真係要好好操多幾次至得，今次又識到好多新朋友，唔知呢次既朋友會唔會好似上年土樓既個班朋友仔keep住玩呢？

 

醉酒灣防線+戰壕

今日又跟左TL去左行山，行程主要係行以前日軍侵華時既其中一條防線---醉酒灣防線+戰壕。
一朝早約左九點向荃灣地鐵站等，之後就搭的士上城門水塘。我地由城門水塘起步。行左大約三十分鐘到，就係戰壕既入口。原來裡面係四通八達，唔跟住大隊行真係好容易走失。可以向入面捐來捐去其他幾好玩。我地向戰壕都玩左成個上晏，食過午餐。我地就沿住麥理浩徑行去獅子山。

我真係估唔到我今日居然可以由荃灣行入黃大仙，痴線架，行左成十幾個地鐵站既路呀！

又來唱K三人組

掃完貨就約左表妹同奶奶去唱K，我地三個都好耐無一齊唱過K囉。表妹依然係K后，佢唱既歌真係新到我同奶奶都無聽過。而我，只係識唱舊歌(下次真係要download定D新歌練習練習先同表妹去唱K)。可惜neway只係比我地唱得個兩個鐘頭九個字。剛剛唱到慶起就要走！我唔制呀~~~
我地幾時再去唱過~~~~~~~~

二百萬奪命奇案

今日約左一班朋友一齊去睇呢套奧斯卡既最佳電影，其實呢套戲真係幾好睇，由其事男主角同殺手既追逐，大家鬥智鬥力。可惜，男主角一死，之後既故事就好似散晒，好多野都無交待就完，有點虎頭蛇尾既感覺。呢個結局完全浪費左之前既佈局。

不過我發覺今次出黎，睇戲只係配菜。我地自己呢套至係主菜，哈哈！話說有兩個朋友要遲入場，咁佢地就叫我地留飛向出面。留飛就要寫名既，於是，我地就留左潘金蓮同武大郎。當我地比返張飛個哥哥既時候，我睇到佢陰陰咀笑。當我地睇完戲之後就再買返兩位朋友點去拎飛。一個就話我睇二百萬，潘金蓮定武大郎。另一個就靜返潘金蓮定武大郎。如果多兩個人遲到，咁我地就一定留武松同西門慶。咁就真係好一套水滸傳。之後我地就出返廟街附近食飯，從遠處已經見到有兩個姐姐企向度，點知老豆行過既時候，我睇到其中一個姐姐已經踏出一步想問佢需唔需要，咁我又開聲同老豆講野，姐姐見佢唔係一個人隻腳縮都縮唔切，呢個過程完全收入我眼底。之後話返比老豆先，佢居然話係咩，點解我唔知架！

東龍島露營

呢期唔知係咪露營露上癮，好似一有時間就會去露營。而且買左咁多野無理由唔用盡佢架！
今次露營目的地係東龍島，約左十二點向觀塘等。買晒野再等埋其他要返工既朋友仔就拿拿淋搭的士去碼頭，如果唔係過左3點班船就有排等。入到去已經見到成個山頭都放滿晒營，而且又有一班童軍向度，所以今次我地唔可以圍埋一齊扎營，要放散咁黎扎。因為今晚晚餐係BBQ，又唔洗點準備，所以攪掂晒D營之後，我地就出左去四圍影相，影都咁上下至返去起爐BBQ，我地呢餐晚餐真係長途賽，由八點鐘燒到成十二點幾。食飽飽又係時候嘆紅酒，吹下水。飲到差不多點幾，見到滿天星星，加上個個又帶晒大機同腳架，於是又走左去set機影星星，點知影影下，朋友仔突然成個跌左落地下，原來佢飲多左兩杯，所以有D wing wing地，好彩無乜野，嚇到我地死死下。影完星星都已經成三點，咁辛苦帶得部相機同腳架黎，當然希望影埋個日出啦！但呢個鐘數，訓又唔係，唔訓又唔係，都唔知點好。最後我地一致通過挨到天光，影完至訓。但夜晚天氣太凍，所以老豆就拿拿淋執柴返黎起返個火用黎取暖。就係咁傾下講下終於都比我地挨到天光，可惜......太大霞霧，最後都係同咸蛋黃無緣。

影完日出都已經係朝早七點，所以個個都即刻返入個營度訓，訓得幾耐得幾耐啦！可惜訓到九點幾已經頂唔順，個營實左太熱，所以好唔情願既事況下都要起身。之後大家都因為太熱訓唔到以繼繼續續咁起身。食完早餐同午餐，我地就搭船出返鯉魚門。