輕鬆行猴塘溪

哈哈！今日又跟左表表班西藏團友去左行澗，呢次係我第二次行澗。約左九點鐘向鑽石山等，之後就搭巴士去高塘。行左大約十五分鐘行路就開始行澗。呢條猴塘溪相對比之前既大城石澗容易行得多，或者今次我地都係hea住咁黎行，一路行就一路影，所以一D都唔覺得好辛苦。行到咁上下就見到個水霸。個個都以為咁短行完既時候，原來行上霸之後仲有既，而且條路比之前既較難行，多左手腳一齊用。行到四點多，終於都行返去高塘。

P.S.今次猴塘溪我自己就覺得唔係好難行，唔知係咪呢排行多左山呢？下次要挑戰下黃龍先得！呵呵~~~

黑色暴雨下的劉美君大開色界演唱會

呢個演唱會我都算等左好耐，由我知道劉美君會開演唱會到加陣都已經等左半年有多，今日終於都睇到喇！(幾驚比浣熊攪亂晒)基本上成個演唱會既氣氛都唔錯，有幾個高潮位。(只係我當時不在狀態，加上附近無乜人企向起玩)睇完呢個演唱會後，發覺香港宜加無乜邊幾個歌手可以唱出呢一種"騷"味。唉.......我真係屬於呢個年代既人，佢既歌我居然有一半以上係識唱！

復活節台中單車之旅 Day 4

(你睇我地間房幾亂)
今朝又係八點幾就起身，早餐終於都唔係食粥，而係食麵包同類似芝麻糊既野。跟住大家就開始收拾行李，臨走之前就緊係要同老闆娘影返張相，多謝佢呢幾日既照顧。

(我地住既民宿門口)

(好好人既老闆娘)

因為今日我地搭三點鐘既飛機，所以節目都只係向台中市既一中街行下。時間無多，我同Vicky匆匆忙忙咁食過午餐，就四圍去搵CD鋪，其實今次旅行既其中目的就係要買CD，成個旅程只有今日先有時間去shopping，好彩好快就已經比我地搵到。我地兩個一入到去就各位搵食，唔洗十五分鐘就已經搵到我地既想要既野，呵呵~~~之後仲有時間去行書店添呀！

(最開心就係買到我想買既CD---久保田利伸)

去到機場都仲係好早，無野做又緊係玩Killer啦！經過尋晚既教訓，今次都係做住觀眾算喇！原本三點二十分起飛既飛機，唔知點解個閘口成二點十至開。就向我地入左閘等出境既時候，向門口先到受傷既團友同其他團友圍左向度唔知講緊乜野，原來係機場人員唔比受傷既團友上飛機，因為怕中途會有意外，最後都攪左好耐先比呢位團友上飛機。就係咁四日既台中之旅又完結！

天公造美的長咀露營

首先向寫呢篇blog之前要"表"揚下個天先，多謝你向我行入長咀既呢三個半鐘唔洗同陽光玩遊戲。雖然食飯個陣就落到狗屎咁，但都得係要"表"揚一下既！
約左老豆向西貢等，搭車入去既時候已經見個天灰暗暗，入到西貢食個早餐買完野就搭車入北潭凹。好彩天暗暗，如果唔係我諗都行得幾辛苦。其實呢條路唔算太難行，不過如果背住個咁重既背包加上比太陽晒住都咪話唔辛苦！終於經過三個半鐘頭既時間，長咀我黎到喇~~~~~
當我地行到去紮營既時候，居然見到之前黎露營既人所留底既！個刻真係感動到呢，所以二話不說，即刻放低野向度紮營。set好晒所有野，就開始去附近搵下有冇樹枝用黎今晚玩Camp fire用既！搵完返黎都已經五點幾。因為高人話臨入黑既時候係最多蚊既，如果唔想成為佢地既晚餐，最好就入營訓下先。我當然唔想啦！咁就入左營入面訓返個覺先，點知訓醒既時候已經係七點半。由是準備晚餐既時候，點知，個天居然落大雨。好彩我地有塊fly咋，如果唔係都唔知點算。食完飯洗完碗都差不多成十一點幾，因為聽日仲要行返原路走，所以刷完牙洗完臉就訓。

第二朝訓醒已經係九點幾，原來今朝七點幾既時候落過場大雨。煮早餐個陣佢又黎落雨喇，希望行回程路既時候唔好再落啦！食完早餐就執好野放向個fly下面，之後就向長咀既四圍行左一陣。我地仲行左去麻鷹洲添！大約兩點半就回程返出去。唔知點解我覺得回程好似行都快過去程，但睇返時間又唔係差好遠。呵呵~~~

P.S. 最後返到屋企，居然發現我全身比蚊咬左三十幾野，癢死我喇~~~~

復活節台中單車之旅 Day 3

今日又係訓到八點幾起身，早餐再次食粥。食飽飽就出發，今日主要係踩呢條東豐自行車綠廊，呢條綠廊係由一條廢棄左既鐵道改建而成。 第一站我地先去百齡牧場，一入到去就見到好多羊咩咩，第一次咁近距離餵羊仔。之後去左後面睇鬥羊，鬥牛就聽得多，鬥羊都係第一次。原來佢地會先向牆邊磨利自己對角先至去同其他羊鬥。呢度除左有羊睇之外，仲有其他用羊奶做既食品，羊奶味雪條都幾好食。

(參觀百齡牧場)

(牧場入面有好多羊咩咩呀)

(嘩！鬥羊，都係第一次見)
參觀完牧場，我地就沿住單車路向前踩，踩到咁上下就見到前面有好多路過鋪既小食，而且後面仲有一架由舊火車箱改成既餐卡。而我地呢班餓鬼當然就唔放過掃街既機會喇！食飽飽又再次向前面進發。

(懷舊火車站)
踩到其中一個分叉路，攪手話不如踩埋上水壩睇下，咁一行人又踩左上去，向個壩上面hea下行下。原來壩既另外一邊有一個記念921大地震記念碑。

(石岡水壩)

(台灣921車籠埔斷層)
行完水壩，又繼續行程。之後我地會經過花樑鋼橋同九號隧道，呢兩處可以話係呢條綠廊既其中一個特色。向條咁窄既鋼橋上面踩單車都咪話唔驚，行完鋼橋就直入九號隧道，入到去黑麻麻仲要落暗斜，而且四周既單車都唔會理你，個個都見車過車。

(在花樑鋼橋上留影)

(向九號隧道入面黑麻麻，又落左暗斜都咪話唔危險)
就向我地出左九號隧道向后里馬場之時，有其中一位團友唔小心炒車，因為當時我人以在前方，消息只係從對講機上收到，不過聽落好似好嚴重。所以有另外兩位團友立即陪佢去醫院。人到去馬場，其實都唔算太大，但就可以騎馬。之前向四川已經試過，所以黎到呢到就唔洗再試囉！行左一陣，有幾位團友踩唔夠，決定由馬場直踩出台中市，而其他既就先踩返民宿，後再搭火車出台中市join佢地！

(后里馬場)

(入面有好多馬呀)
返到民宿，受傷既團友都已經返左黎，醫生話佢應該斷骨。咁我地傾左幾句就搭車出台中行夜市。原來由民宿去台中市都幾轉接，首先要搭一程公車去火車站，之後再搭火車到台中，去到台中都仲要搭多程公車先到。就向我地搭緊火車既途中，直踩出台中既幾位團友已經到左，仲食飽飽添！佢地就食飽野，但我地未喎！所以叫佢地再四圍行下等我地食完野先，最後都約左十點向麥當勞等。

(搭火車出台中)

當向麥當勞等齊人，我地就諗住搭火車返去，點知，火車唔比單車上車，咁幾位團友點算好？最後我地決定搭的士返民宿，諗住一架的士既車尾箱就放一架單車，但司機又話唔得，最後攪左一大輪，最終五百蚊台幣成交。唔知係咪我地住既地方比較近郊區，所以司機們都唔係好識路，試過幾架車既司機停低向度商量點行，又試過停低問附近既人，最後都係要出動到團友既GPS先返到民宿。洗完白白，佢地又再次玩"Killer"，唔知係咪太倦，做主持人既我常常出錯，最後都係做返參加者算。今晚又玩到成四點幾至訓！

復活節台中單車之旅 Day 2

(總統投票站的門口)

今朝八點幾就起身，唉......訓得幾個鐘頭真辛苦。之後就落留下食早餐。今日既早餐係粥，我本身唔係太鐘意食粥。所以都係食左少少就算。食完野就出門口揀單車(因為間單車鋪車左好多架單車向民宿既門口)。點知架架車都鬼死咁高，我呢種咁標準既高度點踩呀！老闆娘話佢仲有一轉單車車黎，個度會有幾架細D既車，但最後原來同之前既無分別。最後為有頂硬上踩架大車。

因為呢日咁係台灣既總統大選，所以老闆娘就帶我地去左附近既票站參觀。因為我地唔係選民，所以唔可以入去入面。睇完我地就出發今日既行程。

(土牛客家文化館)
天呀！點解會咁架！一開始就已經要踩馬路，我呢D踩單車既新手點可以應負得到。好彩台灣既馬路有一邊係比電單車同單車行，都無咁危險。踩左大約四十五分鐘，就到左其中一個目的地---土牛客家文化館。可惜，因為今日係投票日，所以休息。我地就入唔到去睇，所以只係向四圍影下相。跟住我地又去左一個叫東勢愛鄉協進會。佢地係專門做一D扎染既成品，今次我地有機會可以自己試玩扎染絲巾。而且佢地仲幫我地安排左地道既客家菜午餐。飯後有一D團友覺得老闆娘安排既單車路段太容易，所以佢地決定踩另外一條路。而我呢D新手，當然就唔會跟佢地啦！最後就分左兩班人，勁人就踩上大雪山，唔上山既就會去睇整梅子。

(我自己整既扎染絲巾)

(比紙袋包住既係梨黎架)

(用來拜神既茶果)
因為我地唔上山既時間比較多，所以可以向扎染既地方hea耐少少至走。之後我地就再沿馬路踩向整梅子既地方，佢地有好多梅子既產品，我地就不停向度試食同試飲。睇完整梅子，我地就向附近行下。之後就踩返單車出市中心等埋其他人。因為其中有位團友既單車爆左。而我又踩得好倦，所以我就同佢換左位，佢踩我既單車，而我就坐老闆娘架私家車。

(夜市買腸子的嬸嬸)

去到只係見到六個人，原來最後只係得佢地幾個踩上大雪山，而其他人就已經向中途放棄了。到集齊所有人，我地就出左去夜市掃街，本來有諗住出台中，但因為時間太趕加上人由走散左，所以台中就留返聽晚。掃完街就踩返單車返民宿，洗完白白又點可以唔玩TL每次旅行既遊戲"Killer"，今晚又玩到兩點幾至訓！唉.........

行山上爛頭營

本來今次既露營係由4-6號玩呢三日既，但因為4號約左TI舊同學，所以我就改為5號先入去Join佢地。(好彩老豆最後都陪我5號入，如果唔係我諗我真係會盪失路都似)

首先我同老豆約左向東涌等，食飽飯買完野就搭車去伯公坳。正當我地準備上山之時，就收到Jackie既電話，問我地先到郊遊徑Join埋先上大東山定向大東山等。最後決定都係向大東山等(因為老豆話唔知佢地會點行，安全起見都係行返原路。最後先知我地既決定係正確)，由伯公坳行上大東山既呢段路全部都係樓梯(攀升高度大約500米)，仲要無瓦遮頭，拎住個咁重既包包都咪話唔辛苦。上到山頂就再打電話比佢地，原來佢地先剛剛食完午餐開始上山，咁我地就先到天池睇下有冇地方紮營。因為佢地話比我地知由蠄蚷石下面就有路行落天池，點知行左一陣就覺得唔對路，但已經無辦法，只好頂硬上鏟林落天池(可憐當時我著緊短褲，鏟完成隻腳花晒)。兩父女向天池hea左成個鐘都唔見佢地，而且個天又開始黑，所以我地都係決定先上爛頭營個邊紮營先，然後再睇下可以點聯絡佢地。就向我地準備行既時候，就向對面山頭見到Oceanpark，最後所有人都向爛頭營呢度紮營。

攪掂好晒D營就當然準備晚餐啦！(佢地真係要多謝我，如果唔係我帶左個5乜米上去比佢地，我諗佢地餓死左囉！)因為行山既關係，背包不能負磅太重，所以晚餐都比較簡單，只係有茄汁焗豆加豆豉鯪魚炒油麥菜。食完餐飯都差不多成十點幾。執好野個個都走去訓(一來今日行左成日山，二來聽日仲有一程路要行)

第二朝訓醒，hea左一陣又是時候準備早餐。因為之後仲有行返落山，所以個個都食得飽飽。原來佢地諗住行返出東涌既，但個個經過尋日個段辛苦既路都唔想再行咁遠，最後都係決定由大東山行返落伯公坳後再搭巴士出東涌。其間經過蠄蚷石，我地又走左上去玩下影下相，攪左一輪先捨得走。最後我地成班人向東涌食埋個tea至返屋企！