舊同事Y結婚了

今晚係舊同事Y結婚既大日子，我地呢班八樓後座既舊同事又點可以唔到呢。(可惜，唔齊人，大佬趕唔切過落黎)放工約左肥珍向地鐵站等，去到酒樓都係七點幾。無野就我地幾個都係吹下水。今日新娘子好靚，但見佢成晚都要行來行去敬酒，影相就真係替佢辛苦。雖然係辛苦，但成晚都見新娘子笑得咁開心就知佢唔怕辛苦啦！

向度祝佢地兩公婆白頭到老，永結同心！

開平碉樓之旅 Day 3

唔知尋晚"日本貓"係倦得濟，定係驚要同"浪子"一間房。所以尋晚居然無洗白白就訓。所以今朝一早就要洗白白，就向佢入左洗手間大約十分鐘度就出黎。我以為佢咁快就攪掂，原來係無熱水，於是我叫佢試下過隔離問下其他房有冇，點知得出黎既結論係......冇。所以走左落去問，攪左一大輪，最後佢都係要沖凍水涼，為左唔洗其他人等我地，就叫佢地先落去食早餐，我地會跟住落。因為尋日食左麥記，今日就食KFC喇！食完我地去返旅館check out同寄存大件行李之後又坐返尋日既包車。因為有D時間，我地先去迎龍樓。原來迎龍樓係向村入面，因為入唔到去，我地只係影左一齊相就去左村度四圍行下。突然間唔知邊個講起話晒機，呵呵......可憐得日本貓一個用佳能，所以比我地圍。

睇完迎龍樓，我地就去瑞石樓。但架車行左一陣，司機就停埋一邊猛咁講去瑞石樓好遠架，加D錢喇。喂！我地一早講好晒價錢先架喎！你咪由坐地起價。最後我地企硬點都唔肯比錢，最後司機都無辦法。瑞石樓果然係開平最大既碉樓，尋日去加拿大村既時候，已經聽到瑞石樓值得比10蚊入去睇睇。但當我地問要幾多錢入去，佢居然開我價要20蚊，嘩！你無野嘛，唔知收幾錢就話比你呃姐，貴成陪呀，仲入。所以最後我地都係向出面影下相就算。最後我地向十二點半返到出市區，因為我地買左四點半車，所以有大把時間。首先我地去左街邊食下當地既餃子，但食完都仲有大把時間，本來諗住去唱K，但搵左好野都搵唔到，最後都係去左Cafe度hea。

hea到夠鐘，我地就搭車去公車站，四個鐘頭係終於到左深圳。本來諗住向深圳食埋飯至走，但又見過關唔係太多人，所以決定先過關返香港再去上水食晚飯。咁就完成了三日兩晚hea爆，玩爆同笑爆既開平之旅。

開平碉樓之旅 Day 2

一朝早訓醒，就先去麥當勞食個早餐，之後就坐包車出發去睇碉樓。首先我地去左自力村，向門口買過門票就開始入村內遊覽。可能今日天氣唔係咁好，所以都唔係太有心機影相，其中有幾座碉樓係可以入內參觀。其中去到其中一間村屋門口有一對老伯伯同老婆婆坐左向度，咁我地就同佢傾左幾句，再行過幾間又先到一個好得意既小朋友，當我地舉機影佢既時候，佢就好怕羞，但唔影佢咩，佢又鬼死咁多野講。勁攪笑。開始發覺遊人越來越多，我地行多幾座碉樓就決定走。呢個時候都差不多十二點，所以司機提議我地先去食午飯，之後先再去馬降龍村。就係咁，我地向附近既餐廳食午餐，之後再出發到下個目的地。就向搭車既途中"蝦毛"醒先起我地叫左食雞無黎，但又比左錢，蝕左！去到馬降龍村，因為時間關係我地只係跟住地圖上面所講既最佳遊覽路線黎行，加上好多碉樓都唔比入內參觀，所以好快就走。

參觀完馬降龍村，我地又出發去赤坎，呢度四周都充滿懷舊氣息。可惜天氣唔好，如果唔係影相應該會一流。因為我地無買飛入去影視城參觀，所以只係四處走走，大家都好想搵到地圖上影赤坎全景既位置，最終比老豆同域奇搵到，個個都爭住去呢個位影相，(不過點都唔夠人地影得靚)。玩左一陣，我地又再去另外一個景點"加拿大村"。但好奇怪呢個明明向觀光地圖上面有既地方，偏偏我地問過幾個司機都唔識去，有D什至連有呢個地方都唔知，最後我地個司機都要邊行邊問路先入到呢條村。

就向我地入到村口既時候，剛剛有對頭車要出，所以我地就要讓路，就向呢個時候，我居然見到坐向車頭既竟然係之前向台中單車之旅所認識既朋友仔，呢個世界真係細。大家落車傾左幾句，就約左今晚一齊食飯。原來呢條村只係剩返一個伯伯向度睇住，佢仲帶我地四圍參觀黎，又沿路講解比我地聽。點解呢度唔係咁多人識黎，係因為唔想呢度發展到好似自力村咁商業法，希望可以保留最原始既一面。的確呢度同自力村呢邊係有一點分別。同伯伯道別之後，我地就返出開平市區，本來我地諗住今日會去埋瑞石樓架，但時間唔夠，所以就同司機講聽日再包車去。

返到市區我地成班去左KFC嘆返個Tea，食下傾下咁又過左個幾鐘，之後收到朋友仔電話，原來佢地都玩得七七八八，因為佢地同我地住埋同一間旅館，咁就約左佢地向門口大堂等，之後我地又再次去左掃街(因為D燒蠔同土豆實在太好食，不能不再來一次)，同尋日一樣，一坐低就不停叫野食。飲飽食醉，大家又坐向度吹吹水，飲下啤酒。差不多攪到成十一點幾先至肯返旅館。我地為左要令最後一日可以同陽光玩遊戲，大家都不惜一切想盡辦法要令雨神同浪子一間房，可惜雨神一早就知我地想點，所以一拉左我入房之後就死都唔開門，向門口攪左一大輪，最後我都唔理佢地，決定去洗白白先，點知洗完出黎，我居然見到雨神放左兩張向門口。哈哈....有冇驚成咁，就連我去隔離房借完風筒返黎都要拍左好耐門佢先肯開，唉.........

 

露營@狐狸叫

星期五老豆臨時臨急咁約去Camp，因為時間關係，最後都係約得三個人。今次露營目的地終於都係我地講左好多次話去既狐狸叫喇！約左九點半向西貢等，食完早餐買埋野就搭車去黃石碼頭。唔知做乜今日幾多人搭車入黃石碼頭，入到去先知原來高流灣今日舉行清醮，因為咁我地向唔知情既情況下搭左一程免費船，哈哈！入到碼頭都仲要行多四十五分鐘山路先到營地。好彩唔係太猛太陽，行到去營地都係一點多，set好營同fly(老豆表演一個人set fly既絕技比我同瑪莉睇)就開始煮午餐。是日午餐係煙肉磨菇白汁通粉。食完飯無野做，我地各人就各自hea，瑪莉就訓晏覺，我就睇下報紙，老豆就去執柴為今晚既Camp fire作準備。因為臨天黑前係特別多蚊，所以我地就返入營再訓。

訓醒既時候已經係八點囉，肚都打晒鼓，所以又係時候準備晚餐。是日晚餐非常豐富，有洋蔥炒蛋，番茄炒豬頸肉同西芹炒煙肉。食完飯洗埋碗都已經係十一點囉，之後我地三個就圍住個camp fire向度傾計，其間仲聽到有D怪聲，嚇得我同瑪莉呀！唔覺唔覺，三條友仔居然又傾到四點先訓。

第二朝訓到十點就熱醒左，刷完牙洗完臉，就煮早餐。hea左一陣就執野返出西貢，出到西貢仲食埋個tea先返屋企！

開平碉樓之旅 Day1

我地三個訓醒後約埋老豆一齊去食早餐，其間我地一路講返"域奇"推油時既攪笑野。之後返去會合埋想訓多陣既"浪子"，點知我地一見到佢就見到佢個孖潤腸咀。佢話唔知點解一訓醒就係咁，我地就話你尋晚一定係唔知做過D乜，本來就陪佢去左藥房買藥，但去到藥房都係叫我地買消炎藥，咁"蝦毛"有喎，所以無買。之後就去買車飛，向等車既時候就打比"日本貓"話比佢聽我地加陣先向深圳搭車去開平，仲叫佢到左幫我地搵旅館。終於向三個多鐘意之後，我地到左義祠車站。原來"日本貓"仲未到，咁我地就先買張地圖研究呢兩日既行程。大約半個鐘頭"日本貓"同佢個朋友仔"河流"就到左。我地先去食野醫肚先，之後就再去搵旅館。搵左三間之後，最後決定住向呢間建聯旅業($80一晚雙人房)，安頓好都已經係四點幾。今日都應該會四圍hea下，但實左有太多時間，所以最後我地入左間Cafe度hea。本來諗住今晚食小肥羊點知出到去就聞到前面有好香既燒野食味，唔通就係上網D人講既燒蠔？於是我地就沿住香味四出找尋，最於都比我地搵到喇，由開始諗住試少少到最後決定放棄食小肥羊。哈哈！呢度除左有燒蠔之外，仲有燒雞翼，燒土豆，燒九菜同燒茄子等！我地當然就係一邊飲啤酒，一邊食啦！其間大家不停咁講笑，最估唔到原來"河流"到呢個日本語同另類劇集既知識係咁豐富，真係"聽君一席話，勝讀十年書"。飲飽食醉之後就返旅館，由於今次旅程我地有3男4女，咁點分房呢。本來諗住"日本貓"同"浪子"一間房，等"浪子"可以攪掂"雨神日本貓"架嘛，點知"日本貓"死都唔肯，攪左一輪，最後就係三個男人一間，我同"日本貓"一間，"域奇"同"蝦毛"一間。

開平碉樓之旅 Day 0.5

呢個0.5 Day名詞係向"域奇"度學返黎既。準時放工返屋企沖涼執野走，約左"域奇"，"蝦毛"同"浪子"向上水火車站等。上到深圳已經成八點三，尾班車係九點鐘，等埋老豆，我地就諗住買外賣上車食。去到巴士站已經有好多人，問售票姐姐去邊度買飛，一個又話向呢度，一個又話向二樓。都唔知邊個係真，記得以前返東莞都係向下面買飛。但點知到上車既時候，個個人都已經拎住飛。諗住睇下有冇位淨，最後都係無。即係話，今晚我地要向深圳過。買左飯盒，就為有向廣場食左先喇！之後就決定去骨。

可能係星期五既關係，去到都唔係好多人。男女子組各自沖涼換衫就去大廳集合，成個廳都係得我地五個人，首先我地向廳度個按腳，唔知係咪"域奇"第一次去骨，所以唔係好習慣比人按，每次師傅按佢，佢就會不由自主咁縮，攪到同佢按既師傅都陰陰咀笑。之後我地三個女生都揀左個推油，三個女仔一間房，因為推油要除光光，我地全程就睇住"域奇"向度閃閃縮縮，但求能避開師傅既上下其手。下次有機會都要同"域奇"去多次推油至得！哈哈~~~~

笑爆肚的開平之旅

短短既三日兩夜開平碉樓之旅又玩完喇！今次旅行簡直可以用腐敗黎形容，我地唔係食就係影相，又需要趕時間，完全係hea feel，感覺真爽。但點都唔及小郭氏伉儷攪笑。一時又愛，一時又唔愛，都唔知佢地想點。而且今次我仲學識左好多成語，"有上下奇手"，"聽君一席話，勝讀十年書"，"閱覽群碟"等.......真係數都數唔完。總之今次開平勁好玩~~~~

今次既開平之旅，有點失望。唔知係咪之前睇其他人D相既時候就覺得碉樓好靚，所以就好想去睇。但去到既時候，又發覺唔係我想像中o個回事。成個旅程除左呢樣野之外，基本上就無得頂。我地唔係食就係hea，唔係影相就係講笑。你話同呢D傻人去旅行有乜理由會唔開心，靜係有小郭氏伉儷向度就已經笑料百出。唔知下個月既龍勝之旅會唔會咁好笑呢？

抖暑前最後一次營露

今次可能係抖暑前最後一次露營囉！自從上次爛頭營之後，朋友仔似乎對行山去Camp已經上左癮。所以今次我地分開左兩組，一組行獲金組，一組係舒服組。而我，就係行獲金組。首先約左十點三向西貢食住早餐等。買好野就出發去西灣亭，今次我地既路線係西灣亭＞吹風凹＞大浪西灣＞咸田灣＞大灣＞東灣＞米粉頂＞蚺蛇尖＞大浪凹＞赤徑。十二點鐘開始向西灣亭出發，行左大約兩個鐘度我地就到左咸田灣。向呢度對住個海食住lunch，正！hea左一陣就繼續行程，沿路行去東灣都仲好好行。但開始上米粉頂既路就全部都係上山既路，路又斜加上碎石多，都幾辛苦，好彩沿路上都有風，如果唔係都幾係野。終於我地向差不多六點既時間上到蚺蛇尖頂。因怕天黑落山難，所以休息左一陣就拿拿聲落返山，落山呢段路其實一D都唔長，但我就覺得辛苦過上山多多聲。因為條路好斜同多碎石，加上我對鞋實在太"扇"，所以落得好慢，有好多時仲要坐低慢慢咁爬。落到山已經係七點多，我地仲要行多大約四十分鐘先到營地。呢個時候個個都行到死死下，最後八點四終於都到營地，而舒服組既朋友們都差不多已經食完晚飯。我地休息左一陣就先紮好個營，之後就開始煮我地既晚餐。食完野洗埋碗都已經十一點多，最後成班人圍住向營燈向度傾計，唔覺唔覺又傾到成兩點幾至訓。因為第二日有事要早D返出去，所以七點多就起左身。拿拿淋煮好早餐食完又執野走。而我居然仲有力行返出北潭凹搭巴士走，諗起都覺得自己茜利！