龍勝梯田之旅 Day 3

今朝都較左鬧鐘，希望有機會影到日出，但機會都好低，所以最後都係訓覺算。今日約左挑夫八點半，今日要落山喇。全段路都係落住雨咁行，好彩係唔算太大雨。落到山下面都係十一點到。個肚餓到死，就搵左間cafe坐低食野。因為全景樓架車十二點多就到，所以食完野就即刻行出去停車場等車。咁Q又撞到尋日既個對廣州情侶，佢地都係等全景樓既車。等到一點鐘都未見架車，原來前面山路山泥傾瀉，所以司機要清理左條路先可以入到黎大寨，無辦法，我地為有等啦。最後等到差不多三點鐘架車先黎到大寨停車場，司機叔叔原來連飯都未食呀！我地見司機匆匆忙忙食過午餐就拿拿淋開車。大約兩個半鐘頭車，我地就返到桂林。因為我地今晚會搭七點十分既巴，見時間尚早就去食個晚飯先，之後就行去巴士站等上車。

第二朝返到深圳都係八點多，因為老豆趕住要返工，所以走先，而我地三個請左假既朋友仔當然就唔會咁早返屋企啦，於是我地又走左去骨，完骨仲去左小肥羊打邊爐添，三日既龍勝之旅咁就完結！

酷熱天氣下上吊燈籠

新娘潭-烏蛟騰-犁頭石-吊燈籠-蛤塘-三椏村-三椏涌-烏蛟騰
寫呢篇blog之前不能不表揚一個人，本來唔係上面呢條路架，係有D人話見難得好天要上一上個吊燈籠頂影印洲塘，但當日氣溫33度，吊燈籠頂錄得36度，無中暑都偷笑。痴線架~~~~~~
今個星期日再來神山練習第二擊，約左九點向大埔美心食早餐，之後就去火車站等齊人一齊出發，今次都有成十幾人。呵呵~~~先搭巴士入新娘潭，10點半開始起步，頭一段大家都行得好輕鬆，就係我地行得好開心既時候，突然有人打電話話我地行錯路，我心諗無理由架？行去三椏村明明係呢條路，點會行錯路？不過都無理，返轉頭搵埋其他人先啦！點知唔返又自可，一返就大獲，點解會上山架，呢條係上吊燈籠條路黎架喎！個刻先知我已經上左賊船。成座山無瓦遮頭，又剛剛十二點正，太陽伯伯就向我頭殼頂。想晒死人咩！(好彩我都帶左2L水咋！)上到一半山，我地就見到個叔叔坐左向度休息，同佢傾左兩句，我地又繼續上山。上到山頂個個都死死下，不過就真係好難得見到晒成個印洲塘，之前兩次上黎都係白茫茫一片。我地坐左十五分鐘先見到個叔叔上黎，佢停左一陣就去，但落左山一陣又叫返我地，原來佢只係帶左500ml水上黎，唔夠水想問我地借水，於是我地比左支水佢。而我地玩多一陣就由東路落山，原來呢條路我地十五個人無人行過，就算有都唔係咁記得點行，好彩沿路都有前人留下既路標。可能條路唔係好多人行所以有好多蛛蜘網，真係辛苦前面既先頭步隊，不過我都唔弱，中左幾野蛛蜘網。其中有D地方仲要剷少少林。終於三點鐘去到三椏村，唔好講笑一人一罐凍飲加個餐蛋麵，原來大家既水都飲得七七八八，所以順便補給。點知就向我地準備再出發行返去烏蛟騰既時候，居然比我地見到大大架直升機停向路邊？我地就緊係唔會放過機會不停咁影相啦，難得機主唔向樹，我地仲向度諗D人唔係有錢到駕架直升機入黎食碗泥蜢粥嘛？最後六點三終於行到出烏蛟騰，但又偏偏睇住架小巴走，最後等左成九個字先有車呀！
P.S.痴線架，擦在蚊怕水都比蚊針左廿幾野，癢死我喇~~~~~~

龍勝梯田之旅 Day 2

尋晚已經較左鬧鐘五點鐘起身影日出，但天氣實在太多雲，應該都影唔到日出，所以最後都係繼續訓，訓到八點鐘就落下面食早餐。食飽早餐等埋個導遊小姐，我地就出發去睇梯田囉！因為灌左水既關係，加陣既梯田特別靚，而我地四個就一路行一路影，攪到個導遊小姐要邊行邊等我地。行到咁上下，突然見到個廣州既哥哥向路旁，原來佢同朋友失散左，又知道我地會去第三號觀景台，所以就跟埋我地一齊走。最終向前面撞返佢既朋友。點知行行下又開始落大雨，好彩附近剛剛有間旅館，於是我地就入左去入面避雨。本來廣州朋友諗住跟埋我地一齊食飯，但我地又唔覺得肚餓，所以都無一齊食。見細雨少少，我地四個就走先，由於落雨既關係，加上我地之前行既都係泥路，所以導遊小姐提議我地唔好由原路走，改行一條長D但又容易行既路，返正我地有的是時間，所以都無乜所謂。

行左差不多個幾鐘，導遊小姐問我地肚唔肚餓，前面有間旅館，我地可以坐低食個飯。個時已經三點幾，所以最後都係去左食飯先，好彩咋！就向我地踏入旅館無耐，出面就開始落大雨囉！食食下飯，突然間見所以人都走晒出門口，原來落完雨後無晒霞霧，而且仲有雲海，我地四個二話不說拎機出去影相，果然，影左幾張相又變返白茫茫一片。食飽飯我地就返旅館，大家入房休息下，又再拎機出黎等影日落，可惜都係等唔到，最後都係玩啤派打發時間等食晚飯。食完飯沖完涼，我地四個人又向房度開八婆大會！呵呵~~~

再來大埔九龍坑山

為在九月沙巴神山作好準備，所以今個星期日神山團友們進行第一次練習。一早八點半入到大埔同ah mok飲早茶。大家傾下講下，成十點鐘先開始起步，我地沿村屋旁既小路先上發射塔。雖然唔係太大陽光，但無風，所以上山呢段路都有點辛苦。就向我地上到第三個亭的時候，忽然落大雨，咁就舒服好多囉！本來我地係諗住行落沙螺洞之後再出鳳園既，但點知行到分差路口，就見到有個路牌寫住"山泥傾瀉，不准前進"最後我地只好沿鶴藪水塘出返去搭小巴出粉嶺。因為時間尚早，我地就去食個tea，順便傾下神山行程。

龍勝梯田之旅 Day 1

星期五准時五點半放工即走，因為要趕上深圳搭七點半既鋪通宵巴士上桂林。去到深圳都已經成七點。去到三島匆匆忙忙咁食過晚餐，順便幫彼得買埋晚餐。一行四人拿拿聲行過去巴士站，好彩趕得切。第一次搭呢種鋪巴士，原來上車係要除鞋架！向架車度又唔可以四圍行，咁早又訓唔著，好在車上面有電視睇，如果唔係都唔知點算好。可能因為落雨既關係，司機都唔敢開得好快，所以成程車都算叫做訓得幾好，可能就係因為司機唔敢開太快既關係，我地比預期既時間遲左兩個鐘頭先到桂林，就係因為咁，我地趕唔切全景樓既專車，要轉搭公車。首先向巴士站先買去龍勝既巴士，去到龍勝再轉車到大寨。我地都奇怪點解坐滿人都唔開車，而且仲不斷比其他人上車。總之要令到架車連企位都滿先肯開車，仲要途中不停咁上客落客，所以由原本坐兩個鐘頭既車程，最後變成三個半鐘。去到大寨停車場都差不多係四點幾，落左車就見到之前老豆預約帶我地上出既挑夫，哈哈，估唔到又係呢個叔叔，上年我黎金坑梯田既時候都係佢帶路，而且上次仲帶左我地返佢屋企坐添。我諗佢今次應該唔識得我。今日好難得可以見到太陽伯伯，所以我地沿路都一路行，一路影，雖然叔叔叫住我地要行快D，但我地都唔理囉，點知聽日會唔會咁好天架！

最後行左大約個半鐘，就到達我地住既旅館---全景樓，大家放低行李，有人就去去影下相，有人就向房度hea。大約八點鐘我地就食晚餐，今晚我地點左呢度出名既竹筒飯。就向我地等緊食飯既時候，我向佈告牌前面搵返一年前我同小林子所留低既紙條。呵呵~~~~唔知下次再黎既時候，張紙條仲向唔向度呢？食飽飯，大家就各自返房沖涼訓醒，因為聽日要早起影日出。

返黎喇，我從龍勝回來了~~~~

話咁快，短短既三日三夜龍勝梯田之旅就完結。雖然龍勝呢幾日都不停落雨，但好彩向我地到步既第一日曾經有一段短時間係陽光普照，可以影到靚相。最可惜就係天氣唔好，今次又影唔到日出喇！唔通我真係同日出無緣？我唔制呀~~~

三日既龍勝之旅話咁快就完左，今次終於都睇到灌左水既梯田，可惜天氣依然唔好，成日都落雨，但都影到唔少靚相，希望下次再去既時候係可以影雪景。最估唔到上次帶我上全景樓既挑夫，今次又再比我遇上，雖然佢唔認得我！重有全景樓既妹妹比我上次黎既時候大個左好多，不過依然咁鐘意喊！呵呵~~~~

深圳悟桐山

因為未試過向深圳行山，所以老豆問我有冇興趣既時候，我就答有。一朝日七點三我已經坐左向深圳三島入面一路食住早餐一路等。大約十分鐘後佢先黎到，食完早餐就出去睇下見唔見其他人(因為今次係跟行山隊去行)，去到見到個個都係勁人，心即刻諗死火？點算？今次都有成三十幾人去，不過我無個識。hehe~~~~齊人就去巴士站搭車。大約搭左成九個字巴士先到，呢個悟桐山既入口，如果你唔講，我都估唔到點樣行入去。行開頭個段斜路其他好易行，但唔知點解會行得咁辛苦。行到三分一既時候就係有想放棄既念頭，但一場黎到，無理由啊行埋上去架！所以就算係倦，都要慢慢上。終於用左三個半鐘頭度我上到呢個934.7米高既大悟桐山。因為我行得太慢，所以上到頂已經無晒人，所以我地都無跟佢地繼續行前面既路，而係沿路返落山。之所以點解今次我會行得咁辛苦，老豆話因為我無足夠既休息。(哈哈，基本上我星期六晚都無訓過，又何來有休息呢？)不過經過今次既教訓，我知道行山前一晚一定要早D訓。以後都唔敢晚訓囉！