夜探八仙嶺

神山小隊既最後一次練習，由鶴藪經黃嶺同屏風山後再去八仙嶺至大尾督走。
因為宜加日頭既天氣實在太熱，所以今次練習我地改左行夜山，約左五點鐘向粉嶺火車站等(衰囉，成班約左去食下午茶又唔叫人，攪到人地餓住個肚去行山，無陰公呀~~~)。齊人就出發，但點解唔見 mok mok既？原來佢地話mok mok二點幾自已走左去行九龍坑山，之後再向鶴藪join我地喎！真係比佢激C，大熱天時仲自已一個去行山，去到鶴藪就見到mok mok，由於之前行得太耐，mok mok隻腳有D痛，所以佢決定打道回府，而我地個個都叫佢小心呀！同mok mok say goodbye之後我地就開始夜探八仙嶺，沿路行都非常舒服，只係有某一D位無風，好焗，但上到山頂位又幾大風，就係咁上上落落，我地終於向十一點幾行到大尾督，仲趕得切搭尾班車添呀！
P.S. 唔知點解呢兩次行山總覺得自已有點力不從心？唔通真係年紀大？上山無左以前既爆發力。仲有兩個禮拜就上神山，咁點算呢？

突如其來的露營 --- 石欖洲

星期五打九號風球，好地地又多一日假期，但因為成日都無出街，實左無野做，所以就出個貓問老豆星期日有冇攪作，點知星期六下午老豆一個打電話打黎話不如去昂坪Camp，呵呵~~~呢個主意又唔錯喎，所以大家二話不說各自執野。原本諗住四點向東涌等，點知老豆執野執到成四點，所以去到東涌已經係五點三，佢老人家話肚餓要食tea，食完tea再去超市買野，去到巴士站先發覺去昂坪既尾班車向六點三既時間已經開左，吓……咁點算？呢個時候老豆立即作出決定改去石欖洲(其實我都唔知向邊架，老豆話去邊就去邊架啦！鬼叫我唔識路咩！) 之後就改搭巴士去大澳。向石壁水塘附近落車，之後就沿石屎路行入營地，越行就越黑嘛嘛，老豆又衰，有咁快就行咁快，攪到我要追住佢黎行，中間仲要捉住佢個背包唔比佢行得咁快添。半個鐘頭後，終於都到達營地，放低背包先去河度抹下個身先，之後就set fly，就向呢個時候，老豆居然拎左件衫出黎，話係遲來的生日禮物(呵呵~~勁驚喜，因為從來無諗過佢會送生日禮物比我) 。因為豬扒未解凍，但老豆又鬼死咁肚餓，所以先食糖水，等到豬扒解凍後就開始煮飯仔，今晚晚餐有番茄豬扒，煮生菜。食完飯洗埋碗都已經係半夜十二點，襯個天無落雨，拿拿淋去起營，之後又是老豆嘆紅酒食薯片既時間，我地兩個向度傾計又傾到成三點幾(今次係佢捉住我傾計，唔係我呀)，刷埋牙洗埋臉都已經成四點，入到營又訓唔著，聽下歌唔覺唔覺又已經朝早六點，呢個時候先開始有睡意，曚曚曨曨訓到九點幾，一出營就見到老豆拉晒地席出個fly度訓，原來佢八點鐘就比個太陽熱醒，頂唔順所以出黎訓，刷完牙洗埋臉又是早餐時，今日早餐貢丸白汁長通粉，食完hea左一陣就開始執野，其間見到一對夫婦，同佢地傾左一陣。又係食午餐既時候，午餐是茄汁豆配麵包。休息多一陣就行出巴士站搭車回東涌，仲向東涌食完tea至走！
P.S. 痴線架，點解D蚊靜係咬我一個架，老豆居然得個幾粒，而我就有成廿幾粒，有冇攪錯！

日出。昂坪

為在準備九月中神山之旅，所以各團員都相約一齊出黎練習。但日頭天氣太熱，今次我地改行夜山加影日出。發起人計劃由東涌起步，經木棧道上昂坪後再上鳳凰頂影日出。約左十點九向東涌地鐵站等，齊人之後就行至木棧道既入口，原以為夜晚行山會舒服D，但沿路都無風，無得散熱，加上唔夠精神，所以都幾辛苦，加上又揹住2.5L水同相機腳架，就更加辛苦。本來向中游位置既我，一路行就一路落後，最後我地包尾呢十個朋友仔決定去至昂坪就算(其實我都有掙扎過好唔好上頂，但我見行木棧道呢條路都已經覺得辛苦，之後既路仲斜同每級樓梯都高，就算上到頂，我相信以我當時既速度，上到去個太陽都應該已經出左，所以最後都決定唔攻頂。) 咁我地唔上頂既朋友就向昂坪市集度hea同吹水。大約到五點幾，我同ah mok就決定出大佛底博一博睇下有冇乜野可以影(咁辛苦揹左相機同腳架上黎，點都要影一影) 好彩，都有D野影下，咁都好D。最後大家就搭車出東涌，食完早餐就四散。

雙鹿石澗

本來大家都諗住跟山海行大城石澗既，但蛇頭話星期日大城多人呀！所以最後大家私搞去行雙鹿石澗。一早八點九已經入到西貢，首先我同彼得搵間茶餐廳坐低食早餐先，其他人就陸陸續續咁黎，之後去超級市場買完野，就搭的士入西灣亭。大熱天時，個個都行到身水身汗，所以一見到有水就急不及代咁跳落去玩水，以我因為忌水，所以只係向趕邊睇佢地玩。玩夠就繼續行，行到熱又跳落水玩。點知行到其中一個位唔小心跣一跣，本來跣親就無乜野，點知就整濕左部相機，好彩部相機仲用得，不過就short short地。最後去到嗚幽瀑布就開爐煮野食，我地今餐有餐肉公仔麵加咸牛肉炒蛋夾麵包。食完hea一陣就準備打道回府，因為玩水玩得太耐，最後都行唔晒條雙鹿石澗，希望下次有機會再行過啦！

P.S. 真係比高人講中，無帶手套既後果，親隻手，好鬼痛！