盲俠行@2008

花墟公園à九龍塘à九龍城à新蒲崗à彩虹村à彩雲村à順利村à新清水灣道à壁屋à打鼓嶺à西貢公路à白沙灣à西貢碼頭全程20km。

上年見Kitty媽佢地參加盲俠行既時候都已經好想去，難得今年彼得攪呢個活動就當然要參加啦！首先約左十點三向太子地鐵站等，之後就行過去花墟球場報到先。拎左張證，四圍影下相，大約十二點就起步。因為太多人一齊行所以剛開始既時候好塞人，而且仲行得好慢。行到九龍城塞公園都已經成點鐘，呢度有一段路係要大家蒙住眼行大約十分鐘，因為大會希望各參加者可以感受睇唔到野既感覺。之後大家就向呢度休息一下，跟住又續繼出發。因為條路又窄人又多，所以行得非常慢，有時我地會忍唔住而行出馬路。要差唔多行到去壁屋先至叫做好D。呢個時候我地個個都已經好眼訓，為左唔眼訓，我地幾個選擇跑落斜路，沿路其他人見到我地居然仲咁有精力都呆左！最後我地用在六個鐘頭時間行到出西貢，個陣時天都未光，仲可以向碼頭旁邊影日出。

遊走麥徑2段

星期日，風和日麗最好就係去行山啦！亦順便為月尾既台東嘉明湖之旅作準備。八點鐘就約左向西貢一面食早餐一面等！齊人就搭車入北潭凹，九點九開好起步，沿途大家一路影一路行，hea爆，行到咸田灣就食午餐，嘩！有美味餐蛋麵，good~~~除左餐蛋麵居然仲有凍冰冰既火龍果食添。今日個天幾靚，好耐無見過咁藍既天，咁白既雲。好似一粒粒棉花糖咁！好彩今次有帶D50，呵呵~~~最後行到四點多就出到萬宜東霸，之後仲出埋西貢食飯添！

露營@再來長咀

長咀，我又黎喇~~~~
一早先到西貢食早餐，之後就拿拿聲去街市買埋野就搭巴士入北潭凹，十點十分起步，行入大浪凹之後經野豬林入大灣東灣，最後向一點三十五分入到長咀。好彩行呢段路只係有少少太陽，唔係都幾辛苦！黎到首先set好fly先，set完fly都差不多三點囉！就立即煮返個下午茶黎醫下肚，食飽飽後先開始起營，set up好晒所有野就出去執柴作今晚camp fire之用，執完柴都已經入黑。坐低hea左陣又時煮晚餐時，煮呢個三加一飯都攪左成個幾鐘，洗完飯洗埋碗都已經十點多。跟住又開始camp fire，對住個火吹下水，唔覺唔覺又傾到二點幾，走落河邊刷牙洗面再執返好D野，入營都已經三點！唉~~~

第二朝八點幾就熱醒左，拉開營門見有D風，又再訓過。最後攪到十點幾先起身。之後就開始煮早餐，其間都見到好多人行山入黎長咀，食完又準備執野走。起步已經係三點鐘，本來朝早都好猛太陽，好彩向我行既時候又陰陰天，真係有luck，沿路行都無乜問題，但行到大浪村上大浪凹既個段斜路就有想死既感覺，平時行廿分鐘既路，今次要行左半個鐘，落返赤徑後仲有一段斜路先返得到北潭凹，當時天都已經黑晒，又無街燈，個人已經倦架啦，隔離個賤人仲要向樹講鬼故，乜人黎架！終於向六點四十五分行到出北潭凹，最後出返西貢食晚飯。