大鵬所城+南澳兩天遊

呢個大鵬之旅都已經講左好幾個月，今次終於都去得成！

約左九點半向九龍塘地鐵站等，齊人就搭車向沙頭角出發。第一位係中英街，先到當地既旅行社報名，點知原來向深圳呢邊既旅行社係唔會幫香港人攪禁區紙既。咁大家就諗住試下搵出面既嬸嬸睇下可唔可以幫我地屈蛇入去啦，點知都係唔得，最後大家向禁區遠望一陣就去喇！

無得去中英街就為有直入大鵬所城，可惜等左好耐車都無，所以就入左大小梅沙先食個飯，之後再駁車入。但大家食完飯後又好想去大小梅沙行下，只不過入去沙灘都要比廿蚊？為左條氣，領導人誓要搵到條路偷雞入去，最後終於都搵到條山路行落去，(天啊！我諗住去影相咋，點解會變左行山加綑邊架~~)落到去其實係海邊，如果真係要去大小梅沙係一家要綑邊既，但高人睇過條路都幾難行，最後放棄呢個念頭，向海邊影左一陣影就走喇！

之後就等巴士去大鵬，估唔到巴士會咁多人，攪到我地好似成條罐頭沙甸魚咁，迫左個幾鐘，終於都到大鵬，等埋下午先join我地既吉蒂。就再轉車到大鵬所城。去到都已經四點幾！大家都爭取時間去影相，大約影到六點到，朋友二人要先行回港，而其餘既我地就繼續影至天黑至肯收工，跟住就搭車人南澳，先搵左住宿先，跟住就大吃一餐豐富既海鮮餐，我地叫左五個海鮮加三個，埋單都係三百四！低食！返到旅館沖完涼，我地幾個又向房度傾計傾到四點先訓！

第二朝訓醒就先去飲個早茶，之後向南澳附近行下影下相，跟住又要搭返個幾鐘頭車出返深圳市區，因為我仲要趕返香港參加連姨姨既生日飯聚。所以無跟佢地去書城！

情人節露營@南山

情人節對我地呢D孤家寡人就真係慘，好彩仲有班好朋友。
今年情人節我地決定去Camp，本來諗住上大東扎營影雲海，點知因為時間唔夠加上天氣唔好，最後揀左去南山hea camp~~
因為有朋友仔要返上午，所以約左兩點向東涌KFC等，食個飯後大家就出發去買野食，向超市門口大家仲傾計去大東定南山，最後一至通過去南山，如果去南山晚餐就可以食豪佢啦！是晚情人節，當然就食要西餐啦。是日晚餐有肉醬意粉、煎雞翼、煎牛扒同雜菜湯。買齊野就搭巴士到南山，扎好營大家無野做就向度傾下計食薯片，臨天黑就入營訓一陣，到天黑就開始煮飯仔。攪左一輪，開餐！食完飯由男子組去洗碗，返來又是嘆紅酒食薯片同迫供時間，最後傾到成兩點幾至返入營訓。

第二朝訓到自然醒，正！之後就煮早餐，因為尋日無山大東，所以計劃回程行獲金。行程是由南山至地圖上不知明小山後到芝麻灣郊遊徑上老人山繞一圈後返回芝麻灣郊遊徑出貝澳，天氣極度潮濕，加上大霧。上到老人山頂乜都睇唔到，激死！好彩我地自已向山頂自得其樂喪影相。最後返到貝澳都已經七點，共行左五個鐘，倦爆！

P.S. 謝謝兩對熱戀中既情侶們陪我地幾位孤家寡人共度情人節！^o^

奇幻逆緣

之前在電視看到預告時就已經很想看，除了劇情吸引外，還有我喜愛的姬蒂白蘭芝。昨天終於和我家的一對豬爸豬媽去看了，真是一套好戲。

電影訴說的，是時間的流逝，它從來都不會停下來等你。不論你是由嬰兒到老年，還是老年到嬰兒，最終也是難逃命運的安排。就好像其中一句對白” 你可以像瘋狗一樣抓狂，可以用髒話咒罵上天，但到了最後，你還是要看開點”在時間面前，有人生，亦有人死，因為有別離，相遇才可貴。在茫茫人海中相遇，最後也不過是過客。就等同兩條平行線相遇後就各走各路。

或許Benjamin一生註定要孤獨，要受苦，但最後能在愛人的懷抱中死去不是最幸福嗎？

露營@南山+昂坪

話說上次聽到老闆們話星期五至日會帶班仔去行山露營，見時間又夾到喎！所以又跟左佢地去Camp。星期五一放工就先返屋企沖過涼就拎埋背包去青衣機鐵站等域奇，之後就搭車到東涌。食過晚餐同去超市補給後又再搭車到南山營地，一行落條樓梯就見到老闆佢地，乜佢地唔係話帶仔去露營咩？點解會見到老闆一家大細向樹既？原來佢地只係負責做back up，帶隊既係佢地以前既學生。佢地以為我地未食飯，仲留左咖喱雞同法包比我地添！可惜我地已經食左飯，但域奇話唔好浪費，留返佢聽日返黎當午餐食。之後仲問我地聽晚夾唔夾食添，跟住我地食埋個湯圓就訓覺。

第二朝訓到成十點幾至起身，已經見到老闆們執野準備走，域奇因有事要出一出去，所以朝早得返我自已一個。第一件事就緊係食個早餐先，之後就睇報紙(好左之前個晚拎左幾份，唔係都唔知點算) 睇晒報紙就四圍行下影下相，大約一點半到域奇就返到黎喇！咁我地就開始煮午餐，我就煮公仔麵，域奇就煮咖喱雞。食埋野執埋野都已經三點鐘，本來諗住搭車到伯公之後再行地塘仔郊遊徑到昂坪，點知一出路口就走左架車，所以最後決定搭車去梅窩再轉車到昂坪。親住有時間咪諗住買杯雪糕食下啦！點知司機叔叔又話就開車，攪到我地食唔晒要放棄杯雪糕，但上到車又唔係即刻開，激死！最後五點半到達昂坪營地，老闆們已經到達。最估唔到今晚既晚餐除左打邊爐之外，居然仲有-----鮑魚！！！真係諗都無諗過去camp都可以食得咁豪，因為班仔們仲未行完山(聽到佢地條路我都驚，由南山上白富田後唔記記經邊度後到伯公上鳳凰山落昂坪)，所以我地決定等埋佢地先一齊食，最後班小朋友要成十點九先到營地，因為我地一早準備好晚餐，所以帶隊既朋友一到就即刻有得食，可憐班小朋友行到咁倦仲要起營煮飯至有得食。後來見佢地咁可憐，我地都烚左D肉呀，菜呀比佢地，班小朋友食飽飯洗埋野都成二點幾囉！

朝日七點幾就聽到班小朋友開始執野，而我呢個老人家就訓到成八點半至起身，因為域奇要趕住返出市區，所以一起身我地就先執好營，之後先再刷牙洗面煮早餐，最後只係用左一個鐘頭三個字就攪掂所有野，真係快到自已都唔信！最攪笑係我地兩個咩晒背包走既時候班小朋友都仲未攪掂！
P.S. 呢兩個營地真係無得頂，今次係計我第一次去長咀後去camp訓得最好既一次！