梧桐寨瀑布

本來今日大家話去踏單車既，但因為落雨既關係，所以我地改左去梧桐寨睇瀑布。約左十點半向大埔等，之後就搭車去梧桐寨。落車先行一段磨滅意志石屎路之後就開始上山既泥路。首先我地先去井底瀑，呢個瀑真係好靚，唔知係咪因為佢好似自成一角咁，所以感覺有點與世隔絕既感覺。影完相就繼續上中瀑，就向呢個時候雨開始大，所以都唔係留左好耐又再向上至主瀑。去到主瀑，我地又影下相同大休食午餐。之後又再繼續上散髮瀑，上到去四周圍都好大霧，影完相本來就諗住走架喇，點知佢地仲唔心息想去搵埋個仙女瀑，最後唔打唔撞又好係真係比佢地搵到，最後行到五點半先返到起點！

P.S. 尋晚問有冇人帶單返，個個都話大雨唔帶，點知去到個兩個PK帶左大大部單返，激死！

復活節廈門之旅 Day 1

本來呢個復活節假期係應該會去西藏既，但三月尾時西藏政局唔穩定，最後大家決定改去雲南，因為我之前已經去過，所以無跟佢地去，反而跟左表表去廈門！

放假之前一日，放工就去荃灣等埋表表同朋友仔，之後就搭車上深圳再轉長途巴，開車無耐，個服務員姐姐就問我地向邊度落車，佢話到時會叫我地起身！今次呢程車幾好訓，就向我訓到濛濛瀧瀧既時候就有人叫我落車，當我望一下錶，！唔咪嘛，零晨五點？唔怪都知姐姐成日都問我有冇人黎接車啦！原來係咁，呢下點算呢？而且我地落車既位置仲要向高速既路口。落車既時候仲唔知點好，就向呢個時候，姐姐叫我地同另外既兩個女仔一齊搭向路邊既私家車入市區，仲同我地講唔洗比錢。因為要買回程車飛，所以叫司機叔叔先帶我地到公車站。去到公車站買飛，個售飛姐姐話只預售三天前，咁即係要聽日再黎買啦！

晨早六點鐘，三個人又唔知去邊，最後打開資料睇睇，就決定先到集美。其實集美主要係一個學校既區，區內有小中大學。而我地先到既就係集美大學，可能呢間係一開航海學校，所以四圍都會見到有好多有關航海既物品向學校度，唉！如果我都有機會向呢D環境咁好既地方讀書你話幾好呢！行完之後都差不多成十點，肚餓都死，就向學校附近既小食店食個早餐，同老闆娘傾傾下計，先發現原來佢係香港黎既，因為小朋友向呢邊讀書所以就一家都過黎呢度定居，之後就去左集美既其他地方行，因為背住行李黎行，所以個個都好倦，最後行到點幾，決定入鼓浪嶼。

入到去當然先到預先訂左既旅館放低行李，再出去食個tea順便四圍行下，大約五點我地就返旅館，因為要等埋追隊既朋友仔，因為太倦，大家都向等佢黎既時候訓著左！最後六點多，朋友仔打黎話到左碼頭，咁我地就去碼頭接佢，等埋朋友仔放低行李再加上旅館老闆既介紹，我地就去左食海鮮，食完仲向附近行下同影下相，最後又攪到成十點幾至返到旅館沖涼訓睡！

露營@萬丈布

萬丈布 -- 一個應該係我上年生日會黎既地方，今日我終於都黎到。
本來係成班人一齊去Camp，但最後只係得返我同朋友V。算啦，我地兩個都估到架喇！第一次兩個孤兒女去Camp，首先約左十二點向地鐵站等，之後就搭去東涌，先食個麥當勞再去買野。去到巴士站唔洗等好耐就有車，因為我地唔係好識向邊個站落車，所以咪問司機叔叔啦，點知佢答我唔知喎！好彩朋友V睇地圖知道個站大約向邊，落到車沿住姜山郊遊徑行。

途中經過龍仔悟園，可惜入唔到，但我地又點會咁容易放棄，於是偷偷”鼠”入去。其實悟園入面係好靚，如果修緝下，我諗應該會好靚，宜加就咁荒廢左，真係有D可惜。再行過條長命樓梯，終於都到達萬丈布營地，先去搵個靚位，之後set好張fly就落去下面拎水，只不過向拎水既短短時間，我已經身中六槍，癢死我。

拎完水就繼續起埋個營，起完營望出去見到好靚既日落，所以有理無理就拿拿聲拎埋相機出去影相，雖然見唔到個咸蛋黃，但D雲都好靚！影完相見路邊有好多樹枝，就係咁又挑起左朋友V條引，最後就當然執柴夜晚玩camp fire啦！執完柴hea一陣又開始煮飯，是日晚餐有白汁長通粉，煎羊扒同XO醬炒娃娃菜，食飽飯洗完碗又開始玩火了，我地向個燒烤爐度起火，唔知係咪天氣潮濕，所以攪左一大輪至起到個火，因為我地執得唔係太多樹枝，玩左一陣就燒完。跟住刷牙洗面後就訓覺。

今次又係訓得唔係幾好，差唔多天光既時候先訓得著，訓到九點幾又比個太陽熱醒左，首先當然係煮個早餐先啦，有XO醬炒腸粉同紫菜墨魚丸湯，先完早餐洗完野，又開漿執野同hea下，大約一點度，又整左個烘法包黎食。最後兩點鐘出發行去大澳，沿路都唔算太難行，只係最後落斜段大斜路好難行。黎到大澳，朋友V話好掛住伯伯既炭燒雞蛋仔，所以我地就去排隊買，我地仲順便黎個大澳半日添！呵呵！