鳳大北坑

星期日又跟左喪人們去行澗，約左九點半向東涌麥記食早餐，本來係諗住去彌散石澗既，但我地大遲起步加上又唔想摸黑出澗，所以就改去地塘仔，於是一行八人就搭的士到石門甲，之後就正式出發，行左一陣石屎路就開始入澗，但我地沿路行左成十五分鐘，條澗都係無水既，加上又幾晒，大家覺得行到上去都係無水，所以由再改地點，就係附近另外一條石澗---鳳大北坑，先行返出去澗口，再行多五分鐘度就係鳳大北坑既入口，沿路都好平緩易行，但真係太熱，大家都要浸水降溫，連平時行澗只係會浸腳即我，今日都頂唔住要成個人浸晒落去先得，浸完成個人舒服晒，不過呢個舒服晒既感覺只係維持左十五分鐘，之後當然又要再浸水啦！就係咁斷斷續續咁行在個幾鐘，終於都到上瀑布既位，喪人們話上到瀑頂大休，就係咁我地努力向上爬，爬到咁上下有個靚位喎，又有樹陰，又有池仔浸水，於是喪人就決定在此開爐大休，食完野就當然訓個覺先啦！就係咁又攪到四點，係時候要出澗喇，我唔想摸黑出澗呀！好彩行左一個鐘到就到出澗位，我地為左慳錢！決定行返出東涌，最後六點半到達東涌地鐵站，之後成班人仲出埋旺角添！因為收到風鐘Sir做緊全店六折！呵呵~~~`

迷@黃山之旅 Day 3

較左鬧鐘諗住起身影日出，零晨四點幾聽到窗外好似有落雨聲，呵呵，諗都唔洗諗繼續訓！訓到大約八點幾就起身，食個早餐執好行李，就先出發到今晚落腳既地方--排雲樓賓館，一出門口又係大霧到嘔！能見度應該得十米度！行左大約三十分鐘就到，放低行李之後，見到出面既天色好似仲差！其實大家都有諗過出唔出去，但唔出去又係向賓館入面悶，所以最後都係決定出去。每個人都著左上黃山既必需要著既制服--黃色大膠袋雨衣，於是六隻黃色大膠袋就向西海大峽谷出發，沿路不停咁落雨又停雨，而我地就不停開遮關遮，而且落住都好難影相，一隻手要拎遮，一隻手拎住部單反，又大風，都咪話唔辛苦。好好彩，落到差唔多峽谷位既時候雨就停左，向度休息左一陣，就返轉頭。之前一路落峽谷就好舒服，宜加就變成喪上！唉！無計，為有努力啦！我地經大少奶好努力咁吹速下，又比我地預期中快行到返賓館，因為行左咁耐有D倦，加上就算再行都睇唔到D乜！最後大家決定留向賓館既coffee shop hea，一係就唔hea，一hea就幾個鐘。因為之前一日向西海賓館食個個午餐幾好，所以今晚決定再來一次。因為沿途都無乜街燈，加上條路成日都會有類似青蛙既物體出現，而咁啱大少奶係勁驚的，我地呢班貪玩既朋友又點會放過呢做機會，我地成日都失驚無神”夾””夾”叫，嚇到大少奶依話鬼叫！呵呵！我地真係無聊極，向等食飯既時候又向度乜都影一餐，出面既街燈，我地既公仔，真係超無聊，食飽飯又行返去賓館，見今日行左咁耐，呢度又有得腳底按摩，我地班骨精又點會唔幫襯！按完腳仲同師傅傾左兩句，師傅話聽日既天氣會仲差，仲有可能會停索道，如果真係停，就要行返三個鐘頭先落到山，大家聽完都開好擔心聽日既天氣！

熱爆露營@籮箕灣

因為餓Camp而久，就算熱死辣辣都無損我同朋友V既興緻，照去可也。今次既目的地係網上話適合夏天去既籮箕灣。約左朋友V點半向青衣等，之後就搭車到東涌，入完貨就再搭車到水口村落車，再行多二十分鐘度就到達營地，一入去就見到有兩隻營扎左向度，仲以為今次會有鄰居，點知原來是爛既！之後就開始set野，set好晒野之後就開始玩煮飯仔，因為朋友V之前去完四川探訪時村民送左D花生比佢，所以今次就決定試炒花生，炒花生好味，不過我地要再試下有乜方法可以令到花生入味D，就向我地炒到興起時，朋友V就發現有一條長長既蟻路向我地既營進發，所以我地兩個又拿拿淋搬營，攪完一輪又到晚餐時，今次我誇地玩燒串燒，本來都燒得好開心，但唔知攪乜鬼，我地一路燒D蟻就一路我我地附近係咁爬，又爬上我地張枱，又爬落我地隻腳度，唔知係咪因為作打風，D飛蟻，飛鵝又向度亂咁飛，仲成日撞落我塊面度，攪到我都燒到無心機，最後我地快快手食完野執完野就入營避左D討厭既昆蟲，唔入就由自可，一入就個營到又焗到死(明明頭先燒串燒果陣好好風架，點解一入營就一滴風都無，激死！) 又唔可以出去，因為唔想同蟲蟲玩遊戲，為有焗住向營內，好彩有帶風扇，其實開著風扇都OK，只係剛訓著風扇又無電，熱醒之後換電又再訓過，就係咁成晚訓下醒下，好彩朝早六點有一陣清風先可以訓覺好，但訓到八點都係頂唔順要起身，實在唔想再同蟲蟲玩遊戲，最後同朋友V決定立即執野殺入東涌先食野。
P.S. 今次露營乃本人咁多次最討厭既一次，天氣熱唔係最大問題，而係四周既蟻同不知明昆蟲向我地身邊四圍走，多到以為自已去左參加昆蟲嘉年華，頂~~~~

東龍石澗

星期六本來約左以前向英國文化協會讀書既同學一齊去BBQ，但因為人數唔夠而取消左，所以就跟左喪人們去左行東龍石澗，約左九點鐘向東涌等，死仔昇遲到成個鐘，之後就一行四人搭的士到村口，行大約半個鐘頭既石屎路就到澗口，聽講呢條澗出名多瀑布，我地行左一個鐘到就到達連環瀑，呢個時候三位喪人第一件事就緊係去玩水啦，而唔識遊水既我，就坐向旁邊浸下腳算囉！玩左一陣，我地又繼續向上行，大約十二點多就行到伏虎潭，而我地亦都向度大休，就係咁食下野，訓下覺又攪左兩個鐘頭先繼續行，雖然每條瀑布旁邊都有山路上，但個斜度有成六七十度，大部份時間都要手腳一齊用至擒到上去，其中有D大石位我自已一個都唔知點過，好彩有佢地三個男仕沿途幫我，照顧我先擒到，一路上到見到好多好靚既不知名瀑布，就係咁一路行，一路影，最後又攪到五點幾先出澗，之後仲要行返條長命樓梯既黃龍坑郊遊徑返東涌。
P.S. 開頭知道得我一個女仔同佢地三個喪人行一條四星石澗都咪話唔驚，好彩佢地沿途照顧我咋！真係唔該晒！