窺心事

       
今晚約左藹藹去睇舞台劇--窺心事，之前知道會睇所以事先上網睇左個故事大綱。其實個故事幾有趣，一切從一個大話開始，為左唔想比人知呢個係大話，就不停要講大話去支持之前既大話，最後當然就越攪越複雜。結局都係大團圓結局。呢個舞台劇令我諗起多年前既另一套舞台劇--撞板風流。
成個劇我覺得做得最好既係陳文剛(即劇中焦媛既老公)佢既演出好有舞台劇既感覺，但你又唔會覺得浮誇。表達得剛剛好。反而焦媛就太過浮誇，有點反感(亦明白點解上次有朋友睇完VV勿語後就話以後唔睇焦媛)而其他演員表現亦不過不失。

Kitty，生日快樂~~~

睇完戲就出左旺角同我既IVE同學kitty慶祝生日，本來諗住去長沙來個水著生日會架嘛，點知柏布好地地又返轉頭，攪到我地要取消水著生日會改左去旺角唱K。因為要睇戲所以我遲左半個鐘先到！去到個個已經到齊(最衰契女仲細啦，唔係就可以帶埋佢出黎嘛)。今年我地送比主人家既生日禮物係一套泳衣。嘻嘻！(唔知今年仲有冇機會可以落水呢？我今年仲未行下水禮喎？)

變形金剛

今朝一早我個豬媽就向樹叫人地起身，話要睇變形金剛(尋晚問你又話唔知，今朝又澎澎聲叫人起身去睇)佢仲茜利到已經Check晒邊到有得睇，做幾點。佢話一係去葵芳但睇十點幾，一係去荃灣但睇十一點幾，最後就去青衣睇點幾。比我揀就緊係睇點幾啦！十二點鐘去到青衣城買飛，已經得返最前個三行，但無辦法啦，照睇。買完飛我地就去左別府食日本野，食完就去睇戲。估唔到我對寶貝睇得異常投入，仲話好好睇添。

講返套戲，真係好精彩完全無冷場。由開場空軍基地既槍戰，到警車同大黃蜂向馬路追逐，之後就地底基地麥加登復活，到最後公路大戰。每場打鬥都好精彩，可惜打鬥場面太快，實左睇得唔清楚。另外除左柯柏文同麥加登之外，比較有印象既就係大黃蜂同星星叫，其他機械人就唔係太識得。仲有無諗過套戲除左打鬥場面之外，仲有攪笑既戲份，成班機械人去主角屋企拎返個眼鏡，但又唔可以比佢父母見到之後躲藏向間屋入面。哈哈！咁鬼大隻點躲藏都睇到啦！期待第二集！

P.S.睇多次都仲得呀！

07世界女排大獎賽

已經幾年無向現場睇排球喇！因為呢幾年既大獎賽香港分站都無我鐘意既巴西隊，所以興趣都大減。但今次因為契女媽個朋友有免費飛，既然有免費飛就僅係去啦！我地靜係諗住睇中國對波蘭o個場，所以就約左三點向紅館門口等！入到場都有大半人，可能今日唔係打決賽啦！我記得以前係全場爆滿架！睇返本場刊就發覺今次中國隊多左好多新人，我識既只係3號既楊昊，4號既劉亞男同7號既周蘇紅。到出場既時候就只有周蘇紅做正選！其餘兩位都係後備。可能其他既都唔係太認識，開頭都唔係睇得太投入，但中段就開始緊張，可惜中國隊向領先兩局既情況下比波蘭追返三局贏左。
但我發覺好多人都忽略左呢位中國隊既主攻手---9號張越紅，記得以前睇波既時候都有見佢以後備既身份出黎打波，但今次佢就以正選既身份出場，其實以佢既身高同年紀(182cm,32歲)都仲可以拎到正選主攻手既位置，就証明佢一D都唔簡單，雖然佢輸左身高但佢個騰空時間的確比其他人耐，呢個優點可以彌補佢身高，令佢向網上都唔會執輸，而且向D重要時刻亦都唔手軟，唔會虛攻而係照打，其他新人就未必做到。因為心理質數既問題！我覺得每隊球隊都需要一個有經驗既球員向度穩定軍心！呢點張越紅做得到！

第一次行澗--大城石澗

表表放飛機~~~~明明尋晚都話一齊去行澗架嘛，點知一朝早就打電話黎話尋晚唔夠訓，今朝無精神行澗，所以都係唔行。仲問我行唔行，我都準備好晒啦，所以我決定去行。九點鐘就約左傑哥玲姐向荃灣地鐵站等(今次得六個人行咋，傑哥，玲姐，玲姐個妹，亞榮，Phoebe同我)，搭小巴去到城門水塘，無諗過大熱天時都仲有咁多人行山，成個小巴站都係人。我地沿住山路行左大約二十分鐘到就已經到左澗邊，之前玲姐已經同我講過行澗同行山唔同，行澗用既體力比行山要用好多倍，開頭都唔係好明，但行左個幾鐘後就明白，因為行澗唔只靜係用雙腳，係要手腳並用，基本上係用晒全身既力去行。點知行到半路突然間落雨，(Oh my god...第一次行澗你就落雨，仲要人地無帶遮添)。咁我地就即刻揾個地方等雨停。之後行多一陣我地就開餐囉！今次傑哥同玲姐居然帶左隻雞黎煲雞粥？仲會煲埋清保涼糖水。之前我地已經食左個西瓜喎！傑哥同玲姐真係茜利，行澗仲可以拎到咁多野大約休息左兩個鐘，我地就繼續行出澗，唔知係咪真係累，所以下半段行澗我都行得好慢，好左傑哥向旁邊睇住我，見我唔夠力攀上大石就扶我一把。最後終於都行到出條澗，其餘既山路就易行得多，呢個時候我又回復以前行山既步履。

Phoebe緊係跟得傑哥同玲姐行澗行得多，今次好勁呀，全程都自己攪掂唔洗傑哥粗心，佢仲可以照顧埋我添！行過今次之後第一件事就係要買過對鞋，今日對鞋"扇"到嘔。我成隻腳瘀晒！

不能說的......秘密

之前睇每當變幻時既時候，就已經好想睇周杰倫呢套不能說的...秘密。今日終於都睇左，可能之前已經睇左影評，知道個故事大約講D咩，所以時空交錯既部份對我呢講無咩驚喜，反而令我印象深刻既係當女主角返去自己時代，佢將呢段經歷告訴別人而無人相信自己，就連母親都覺得自己精神有問題，個一種無助，個一種痛苦，無人能夠體會，到最後連自己都懷疑自己有問題，看後心情久久不能平服。另外，向故事當中常常播住一首老歌--"情人的眼淚"。桂綸鎂向戲入面講過希望找到一個同佢一樣喜歡呢首歌既男仔，最後她找到了。那......我呢？

為什麼要對你掉眼淚
你難道不明白是為了愛
只有那有情郎眼淚最珍貴
一顆顆眼淚都是愛都是愛

為什麼要對你掉眼淚
你難道不明白是為了愛
要不是有情郎跟我要分開
我眼淚不會掉下來掉下來

好春常在 春花正開
你怎麼捨得說再會
我在深閨 望穿秋水
你不要忘了我情深 深如海

一晚趕兩場(尾場--BG舊同事)

   
打完邊爐，澎澎聲過隔離neway揾返班舊同事一齊唱K，佢地成班一早就到左啦！係我最遲。佢地個個已經唱到不知幾開心，今晚除左一齊聚舊之外仲順便同Sybil ma ma慶祝生日，餅神親手整左個芝士蛋糕(好耐未食過餅神既芝士蛋糕啦！)亞Jay原來都唱得兩咀，以前向公司都唔覺得呀！仲有好耐無見過我對乖仔乖女啦！乖仔唱歌依然好聽，乖女都唔弱，哥哥今日居然可以早放工同我地一齊唱K，平時佢收十二點幾架嘛！好懷念以前同佢地一齊做野既日子~~~~~~~
幾時再約下次呀~~~~~~~~