無國界野外定向比賽

今日一朝早就出到東涌，因為之前報左名參加無國界野外定向比賽就係今日舉行。約左亞琳，表表，姐姐向地鐵站等，今次比賽既地點係昂坪，咁我地就去搭昂坪360。首先我地就去左起點度報到，之後就拎號碼布同記分牌。仲以為會一次過比埋地圖定我地有時間傾下條路線，點知，佢地係向臨出發前3分鐘先派。10點50分起步，要向兩個鐘頭內找晒30個check point，所以一起步我地首先行埋一邊商量一下我地既路線，之後就開始出發找check point。

我地只係頭幾個check point找得耐少少，其他既check point都唔算太難找，可能地方唔大，有Dcheck point都係見到其他人行過去我地就跟住行而找到既！hehe~~~

最後我地向兩個鐘頭內找到16個check point(如果我地唔係hae住咁找，而係追成績咁玩，應該唔只找到16個check point咁少)。完成完比賽都已經成點幾鐘，實在太肚餓，都唔等成績公報就返落東涌食午餐。(成績要等姐姐話我聽)

無痛失戀

今日向屋企超無聊，終於都拎起問人借左好耐既VCD黎睇---無痛失戀，一套想睇左好耐既戲。人們不是常常說時間可以忘記痛苦的回憶。沒錯，時間的確可以做到，但由當初的痛苦到最後的接受，每個人所需要的時間也不同，有的可以幾日或幾個月，有的可能一生一世也忘不了。如果可以一下只就將所以痛苦的回憶都洗去，是否會開心點？
如果世界上真的有一間可以洗掉記憶的公司，你會選擇去光顧它嗎？
故事大綱

祖發現分手情人海迪竟然光顧洗腦公司，將二人的愛情回憶洗得一筆勾消而大受打擊！祖深深不忿，決定也要洗腦忘情，豈料當他記憶逐漸消失時，才發覺自已其實不捨得，但洗腦程序進行中，他要怎樣做才能保住甜蜜的記憶呢？祖發現原來海迪已是他心中永遠的唯一…….

深圳華僑城

今次又跟左TL去左深圳既華僑城一天遊，約好九點向皇崗集合。齊人就出發搭旅遊巴，可能沿路都塞車，所以去到華僑城已經係十一點幾。向門口派過入場票就四散，本來就諗住纜車上去上面既景點既，但纜車站打晒蛇餅，最後都係決定搭小巴上。上到去個個都肚餓，所以就先食午餐(呢個碟頭飯既午餐真係麻麻地)

食完飯就出發四圍去玩，首先我地去左七色花海，呢度個環境好似北海渡，加上今日天氣好好，(真係要多謝雨神Kitty媽無法作)所以影出黎既相都特別靚。其間都不斷撞到其他團友。其實呢個華僑城都分開左好多個唔同既景區，但我地實在時間有限，最後都係玩左兩個景區就要走，因為上黎既時候無搭到纜車，所以落去既時候就一定要試。但去到纜車站都係打晒蛇餅，不過都無辦法，為有照等，太陽一落山再加上向山頂位吹住風咁等就真係凍上加凍，好彩身邊有兩個人肉暖爐，如果唔係都唔知點算！落到停車場先發覺我地幾個係最遲！返到皇崗都已經七點幾，本來佢地諗住拉大隊去食飯既！但我地幾個就想去小肥羊打邊爐，最後都無我地都無跟大隊。

我地七個人(我，sam，kitty媽，cynthia，大叔，bowu同乖仔)就去左小肥羊打邊爐，好彩唔洗等好耐就有位。哈哈，超高興地我地七個都鐘意食羊，咁就當然叫個全羊宴啦！最後食左四百幾埋單！食完野順便去埋水雲間骨添！

聖誕鳳凰之旅 Day 6

(今次唔行囉，改搭索道)
尋日玩完天子山同袁家界，今日就去黃石寨。經過尋日咁行山法，今日點都要搭索道。(加上下午就要搭火車走，已經無時間玩，所以更加唔可以行上去)，咁大霧向架索道上面乜都睇唔到。點知上到山頂仲衰！四周都比大霧包圍，能見度只得兩米。乜風景都睇唔到，最後我地居然搵人扮五指山比我地影相當到此一遊算。但時間尚早，我地諗住向附近既餐廳坐低飲杯咖啡順便取暖，點知呢間餐廳完全貨不對辦，十五元既一杯熱咖啡但一D咖啡味都無！又一次比人搵笨！

(白濛濛乜都影唔到，咪叫朋友扮五指山比我地影囉)
飲完咖啡，我地就搭返索道落山，諗住向附近食午餐，點知搵左好耐先搵到，但個陣已經係一點喇！我地搭火車既要兩點出發去火車站，所以食得好趕，好彩最後都趕得切。去到火車站都係四點幾，仲有少少時間就去左買杯麵做今晚既晚餐。乖仔佢仲勁，居然買左幾支啤酒上火車話今晚飲喎！火車准時五點開車，咁既時間食飯又唔係，訓覺又唔係，最後咪就係玩killer之嘛！我地玩到成差不多九點先記得要食飯！因為第二日要返工，加上火車十點鐘就關燈，所以食飽飯，各人都訓覺囉！

火車第二朝准時八點鐘到達廣州，唉.......點趕得切九點鐘返到公司，所以咪要請半日假囉！反正都請左假，所以去到深圳同大家食過早餐飲個茶先，見仲有時間可以返屋企沖埋涼至返工添呀！呵呵~~~~

聖誕鳳凰之旅 Day 5

(張家界的入口)
今日既行程主要係張家界，原本就諗住尋日黎既，但黎到都夜，所以決定今日先黎，好彩今日先黎，可以慳返二百幾蚊入場費。開頭大家都係諗住搭索道上天子山，但後尾佢地話大約兩個半鐘就上到去，所以最後都決定行上去。

(好多唔同型態既山)

(唔想行就可以坐環保車)

(高度不一的奇山異石)
開頭既一段平路都非常容易行，大約行左十五分鐘度就開始要上樓梯，以為行一段樓梯就會行完，點知原來一路都係上樓梯，仲要係攀升一千米既高度，咁咪即係行緊鳳凰山。由原本一班人一齊行，但因為每個人既步速不一樣，所以大家都分散晒，行行下就得返我同大叔兩個一齊行，唔知係咪全程路都係上樓梯，好多時行幾步就要休息一陣，仲越行越熱，由之前著晒羽絨都最後熱到除靜件長袖衫。好彩沿路大叔都肯等埋我，唔係就真係得我自己一個人行。

(我真係行左成千幾級樓梯上天子峰架)
行到咁上下，見到有買燒土豆既小販，唔好講笑，即刻整返兩串先，食食下就見到jackie同billy等人，大家齊齊食土豆。食完又繼續。最後終於向十二點上到天子山，上到去既時候已經見到bowu向度食緊臭豆腐，哈哈，估唔到自己咁勁，我居然係最先上到山頂既個幾個人。諗住去食飯，但又唔係好肚餓，加上餐廳買既碟頭飯唔想食，所以我地就出去四圍行去掃街，大約兩點多，其他人都陸陸續續咁上到山頂，之後就搭觀光巴士到袁家界。但呢個時候實左太肚餓，所以我，大叔同bowu決定向路邊食個杯麵先上車繼續玩，唔知係咪因為太大霧，所以都無乜心機影相，都係行左個圈就算。行到咁上下，又係都返我同大叔兩個，因為要趕住五點半前落到山，見個地圖指住去天梯既路好似好近，諗住行落去，點知行行下唔對路，都係返轉頭等埋大隊安全D。原來係有巴士落去天梯入口既，好彩無行姐，搭車都要成半個鐘，行落去天黑都未到。

(沿路有好多呢種連心鎖)

落到天梯售票處，全世界諗住博大霧買學生飛，點知查飛既時候比人發現左。最後都係要補返錢。原先以為坐天梯會好好玩，點知......有種搵笨既感覺。正當大家仲好有興緻咁研究個天梯既時候，我同大叔就已經搭電梯落樓下，落到去咁有巴士等人，我地唔埋就上左車暖下先，點知一上架巴士就開車，我地連架車去邊都未知呀，好彩最後都係返落山。落到山等埋其他人就先返酒店，之後就成大班人一齊去食韓燒。我諗老闆都無諗過一下只有成四十幾人幫襯，所以單攪到好混亂，我地個就不斷有野食，其他就係咁睇住我地食。真係唔係幾好意思。今日行山實左太倦，最後我地又再去多次洗腳。以為洗完腳就可以訓覺，點知.......又去左人地間房玩killer，最後又玩到三點幾至返房訓！

聖誕鳳凰之旅 Day 4

(湖中的小船)

如果唔係尋晚無沖涼，我都唔會向個咁溫暖既被窩入面行出黎。七點幾就起身沖涼洗頭，之後就到Sam，點知到Kitty媽既時候居然無熱水。好彩老闆娘借左另外一間房比佢，佢先有熱水沖涼。執好晒行李，食過早餐就去停車場集合。人齊就搭車出發到張家界。因為我地會路經芙蓉鎮，所以我地就向呢度停車參觀一下，順便食個午餐。

(芙蓉鎮的街道)

(好可愛既BB)

(芙蓉鎮的城門口)

因為時間唔係太多，所以向附近行左一陣就去搵食，周圍都只係得一D買小食既店鋪，搵左好耐至搵到一間飯店。拿拿淋食過飯，又再次坐車去張家界。其間因為我地同導遊為左晚餐上既安排而有所爭吵，導遊中途停車，經過一輪商議，最終我地今晚既晚餐都係要跟導遊既安排。去到張家界既酒店已經係夜晚既六點多，分好房放低行李，就去食晚飯。本來諗住食完飯沖完涼就訓覺覺豬，點知Sam又提議不如去洗腳。最後一行七人又去左附近洗腳。洗完腳返到酒店已經差不多十一點幾，仲有幾分鐘就十二點，所以我地個個都圍晒向走廊度準備倒數迎接聖誕節既來臨，不過我地實在太嘈，倒數完就即刻比人鬧，所以數完即刻四散。散完又有人提議玩killer，貪玩既我地當然就有去玩啦！最後又玩到三點幾至返房訓！

聖誕鳳凰之旅 Day 3

(陰天下的鳳凰古城)

(河邊的旅館)
本來諗住今朝起身去影日出架，但實左太凍，所以最後都係無去。訓到八點幾起身洗面刷牙就出發食早餐。因為約左大隊十點鐘向虹橋等，去到虹橋先知原來佢地個個都未食早餐，早知就唔洗食得咁趕啦。但最後我地四個都係無等埋佢地就走左，因為驚太多人好難睇到野。四個人漫無目的咁四圍行，影下相。可能天氣唔係太好，大家都無乜心機行。向附近買過手信就返旅館放低野就出去食午餐。

(好特別既橋啊)

(黃葉襯托著古城)

(每間房都掛著紅燈籠)
因為下午仲有大把時間，所以我地決定去cafe食午餐順便hae下，寫下遊記聽下歌。原來咁樣向cafe hae既感覺又真係幾舒服。仲向cafe撞到Emily佢地，最後我地一行八人又再四圍行。行到倦，我地又找個地方坐低食野。我地由細個睇既卡通片到Jackie又好Dry既心事，勁攪笑。食完野我地又分開各自各行，四個人又無無聊聊咁行出古城。發覺都無乜野睇，又再返去旅館放低野去食晚飯。點知返到旅館又撞到大叔同bowu，咁就六個人一齊去食晚飯。我地去左附近既大排擋食串燒！我地叫左好多野食有燒魚，串燒牛，羊，串燒菇同菜！總之就超好味。

(在Cafe一邊嘆咖啡，一邊寫遊記)

(鳳凰古城的街道)

(河水中鳳凰的倒影)

食完晚飯，我地就出發去酒吧。因為今晚我地包左間bar攪聖誕party，原來我地差不多係最遲個幾個，所以只好坐向近門口既位置。聖誕party又點少得交換禮物呢！今次我抽到simon既日歷。向party度大家都飲左好多酒，我覺得自己有D唔係幾得，所以都係出門口吹吹風！咁大家又出晒黎一齊吹水。大家仲好似玩到唔夠喉，決定再去小傑個邊再玩過，一行十幾人就浩浩盪盪咁出發。唔知Kitty媽之前向party度係咪已經飲大左，佢居然向個露台度教大少奶同用衣架玩射箭。哈哈！笑到我地死死下。跟得TL旅行，又點少得呢個指定遊戲--"killer"。我都係第一次玩咋！佢地又唔肯教左人玩先，要人地一路玩一路學，最衰仲要第一鋪就做killer，唔洗三分鐘我就比人殺死左啦！玩下玩下又玩到成四點先走，返到旅館個個都靜係想訓覺，最後都係決定聽朝先沖涼！

私攪灣仔大露營

私攪露營既日子終於都到，首先我約左Kitty媽八點三向旺角小巴站等，點知向小巴站撞到大叔，唔想向條街度等，所以我地兩個就去左附近食早餐邊食邊等。等埋Kitty媽之後就搭車去西貢。去到等埋其他人就先去買定今次露營既野食。買完野就搭車去黃石碼頭再轉船。入到灣仔都只不過係十一點幾，第一件事當然就係找個靚地方札營先！好好彩我地找到個附近有涼亭既地方札營。攪掂晒就開爐煮午餐，我地既午餐係蜜糖腸公仔麵。食飽飯又無野做就緊係訓返個覺先啦！於是成班人個個拎晒地席露天訓個靚覺先！訓醒既時候，下午班既朋友仔都差不多入到黎！hae下玩下，唔覺唔覺又到晚飯時間，今晚既晚餐超豐富，有臘腸飯，煎雞翼，什菇煲，同沙嗲金菇肥牛煲。入夜後天氣開始凍，所以大叔同bowu就執左D樹枝黎生左個火取暖。我地十個圍住個火，一邊飲啤酒一邊傾計。傾到成兩點幾大家先入去訓。

唔知係咪天氣太凍，唔係幾訓得到，所以八點幾就已經醒左。行出去就已經見到bowu同Vicky已經醒左。刷完牙洗過面，其他人都陸陸續續咁起身。又係時候準備早餐，早餐又係超好味既烤法式麵包加鹹牛肉炒蛋。食完早餐，我同Vicky就決定黎個晨運--行灣仔半島一圈。行完都只係十一點多！點知一返到營地就見到大叔同bowu鬼鬼鼠鼠咁入左我個營度攪亂擋。即刻拿拿淋返去，兩隻死野居然迫左入我個一人營！仲要拖埋我入去，真係激死！玩完一輪又係時候食午餐。午餐有五香肉丁炒烏冬，午餐肉湯烏冬同煎蛋。食完午餐執埋野就行返出海下搭小巴返西貢。

My Blueberry Nights 藍莓之夜

終於都睇左藍莓之夜，一套我好想睇既戲。故事由一個女孩失戀開始，她在酒吧遇上酒吧老板。連續幾個晚上，她跟他訴說失戀的心情，就由那一夜開始，老板就習慣了她的來臨。只是有一天，女孩決定要離開這個傷心地。她穿洲過省的想尋回自己。在途中她遇上不同的人，一個在分居丈夫死後才知最愛是誰的少婦，一個選擇用自殺來成全妻子的警察，一個好賭成性既少女。每一個人都要在失去的時候，才知誰最重要。沿路女孩都將感受寫在名信片上，寄給老板。最後，女孩從他們身上學會了一件事。不要愛得太遲，因為錯過了就是錯過了。那一刻，她決定回到原來的地方，因為她知道，那裡總有一個人等著她。
好鐘意其中幾段對白

"拋棄了鎖匙，鎖上的門就永遠都開不了"

"就算鎖匙在手，也不等於門就能打開"

"就算門已經打開，你想要的人也不一定在其中"

每晚咖啡店打佯時，芝士餅總會賣個一空，朱古力餅和蜜桃酥也所餘無幾，唯獨總有一整個藍莓批剩了下來。藍莓批沒被挑選，不代表它有問題，對某人來說，它甚至是最好的。

我在伊朗長大

今日又同左TL既朋友仔去左睇戲"我在伊朗長大"。本來無諗過會睇既一套戲，因為之前同事睇過話好睇，加上一大班人所以至決定去睇。但呢套戲出奇地好睇，佢借用一個女仔成長既經歷去帶出伊朗近幾十年既變化。故事簡單易明，最喜愛女孩瑪珍的，一個有主見同可愛既老人家。常常向適當既時候給瑪珍意見。正所謂家有一老如有一寶。如果我媽媽好似佢咁就好！

跟ah mok去行東涌！

東涌-->石門甲-->地塘仔-->昂坪

今日跟左ah mok同佢既朋友去左東涌行山，約左九點半向東涌消防局門口等。唔知係咪呢排唔夠訓，今朝扎醒已經係八點九，所以拿拿淋刷牙洗面立野就即走。(就係因為向東涌等先會趕去，如果約其他地方等我諗我會唔去。)最終都係遲左十五分鐘至到。之後就向昂坪出發，今日既行程好輕鬆，一D同唔難行，行下影下，大約一點幾就去到昂坪。佢地話搭纜車落東涌食午餐，但我，ah mok，bbop同edith都覺得要$68好貴，反正我地又唔趕時間，所以我地就向昂坪食完野再搭巴士返東涌。

聖誕鳳凰之旅 Day 2

(到左懷化火車站喇)
向火車度訓醒已經係九點幾，因為要成十二點幾先到懷化站，所以就慢條斯理咁去刷牙洗面。洗完面撞到kitty媽同小傑，咁我地三個就去左餐車度食早餐。因為無乜選擇，所以我地都係叫左炒麵，炒飯share食。食完早餐都仲係好早，咁大家就圍埋一齊傾計。傾傾下個大叔唔知做乜好地地除左隻鞋，咁好既機會我當然就緊係拎走佢啦！佢想過黎拎返隻鞋，一失重心成個跌左向地下，當場笑到我同kitty媽死死下。
終於十二點半到達懷化火車站，我地向附近食過午餐，就坐旅遊巴到鳳凰古城。去到古城已經差不多四五點，因為有成六十人，所以最後都係各自搵住宿，因為今日係冬至，所以Billy提議我地六十人一齊去食飯做冬，所以約左七點向虹橋等。咁我地一行六人(我，sam，kitty媽，大叔，bowu，乖仔)就去左附近搵住宿。本來已經搵到一間幾好既！點知乖仔話佢想住向江邊，所以佢自己再去附近搵過。我地勸左佢幾次都係要堅持，咁就算啦！放低晒野，見仲有時間，我就去沖個涼先。

(又是掃街時間了)

(鳳凰古城的夜景)

(又落bar飲野)

(你睇有幾多啤酒樽)

去到虹橋就已經見到兩邊有好多野食，我地實左忍不住先掃一轉街先。咁大個女都好似係第一次唔向屋企過冬至。所以呢餐鳳凰冬至晚餐食得好豐富。食過晚，我地就出左去四圍行，順便搵下有邊間Bar聽晚可以容立到我地呢六十人開X'mas Party。搵完之後，就去左附近飲野。玩玩下我跟左乖仔返佢個間旅館，我想睇下佢住既呢間有幾靚，如果係得既！我地聽晚可以搬去佢度嘛！傾下玩下，咁又十二點幾。大叔同bowu話走先。我地三個女仔留多一陣都決定走，就當我地出門口既時候，居然又撞到佢地兩個。呵呵，原來佢地盪失路想賴低我地三個女仔自己走，最後都係五個一齊返去旅館。去到旅館附近，大家都見有D肚餓！所以就走鬼左去食消夜，個蒸餃好好味。食完消夜向超市買埋日用品就返去旅館訓覺囉！

除夕倒數！

同契女食過飯後，我就搭車入錦田同TL既朋友仔BBQ和倒數。之前已經有一班朋友仔入左去燒野食！而我地呢D有上一場既就約左十點向錦上路等。齊人就等朋友仔既車再車我地入去。呢個時候Jackie仲向九龍，所以就決定我地先入去，之後再出過黎接佢。入到去原來大家都已經燒得七七八八。雖然之前已經向瘦契媽屋企食過飯，但有我鐘意既羊扒，所以最後都係燒左D野食！今次BBQ有好多野食，有海鮮，羊扒，最緊要就係仲有安格斯牛扒。哈哈！我地今次用左個新既方法去整，就係先用紅酒煮之後再放落爐度燒。呢個牛真係得，下次要再試。差不多到十二點既時候，所有人一齊上晒天台，一齊倒數，一齊飲酒。第一次同咁多人一齊過除夕！當大家食飽飽之後，就拉大隊北上骨！而我咁就坐左Jackie架車，佢原來唔熟新界既路，我地向附近攪左一陣先搵條路。幾驚最後佢車返我地出旺角。去到深圳既水雲間都已經係零晨三點幾。所以大家決定先沖涼之後再去大廳訓夠先再骨！本來大廳個環境係幾舒服既！可惜隔兩張床個位哥哥既鼻寒實左太勁！所以都唔係訓得太好。訓醒已經係第二朝既十點，因為之前試過骨唔係太得，所以今次就試下推油。原來推油都幾舒服，只不過有時姐姐都係大力左少少。但我覺得舒服過骨！hehe~~~推完油攪掂晒都已經成點鐘，本來就諗住同大家食理飯至走架！可惜自己唔係好舒服，所以最後都係跟Jackie走先！