西貢探營

路程---水浪窩(水浪窩營地)---榕樹澳---墇上(墇上營地+X位)---高塘---猴塘溪(猴塘溪營地)---大灘(大灘營地)---黃石碼頭(黃石營地)
雖然尋日係有雷暴警言，但依然無阻我同Peter既決定，照出山是也！
其實今次探營地既目的係想睇下D官方指定營地有邊個得，邊個唔得，邊個位無咁多人，等下次我地兩個女仔或單拖去Camp作準備既！
首先約左十點半向沙田等，先向水浪窩落車，去左水浪窩營地視察，上到去剛剛見到有幾個人正在執野，呢個營地都幾好，之後我地沿車路行入榕樹澳，呢段漫長既石屎路簡直就係磨滅意志，好似行極都行唔完！一個鐘頭後，終於都行到去榕樹澳。之後就經天梯向墇上出發，呢段路比我想像中短，唔知係咪因為沿路我地有傾有講，所以唔覺唔覺又行完，首先去左搵第一個X位，呢個位都相當開揚，又好風，夏天黎應該幾正，但只可以扎三至四隻營。之後就黎到士多，本來諗住食返磅豆腐花，點知無開，向士多對出既草地食過午餐又再向第二個X位出發，呢個X位比之前既大好多，而且四周仲有樹包圍，正！之後就落返高塘，再沿車路行去猴塘溪，但猴塘溪呢個營地真係唔得，又細又近路邊。睇完我地就由大灘郊遊徑行返出大灘，大灘呢個營地又係好細同好近燒烤爐，如果想靜靜地都幾難，最後行到黃石碼頭，咁就順便探埋呢個營地，但…….. 算啦，返正呢個營地我諗除非我單拖，如果唔係都唔會黎，最後我地就搭車出旺角，因為要幫朋友V入返對快艇，呵呵！

江西婺源油菜花之旅

上星期五晚跟左朋友去江西影油菜花。放工就即刻趕去上水美心先會合田生田太佢地，之後就當然食個豐富既晚餐。食飽飽就出發到羅湖，等埋小林子就準備上車開始呢個十幾個鐘既漫長旅程。終於向第二朝既十一點到達江西既婺源，真係辛苦我囉！先到售票處去買飛，之後就開始四處玩，同影相。原來婺源既景區係好大，每個點與點之間都要座車既！仲有張入場卷仲好似八達通咁，每入一個景點都要拍一下咭，仲要加上打手指摸，真係高科技！沿途都見到兩邊都係盛開中既油菜花田，真係好靚！到在午飯時間，到處都係人再加上思溪延村呢度好少食市，就向我地四圍搵食既時候，有個老伯伯走黎問我地係咪想食野，於是佢就帶左我地去佢屋企，由於佢地屋企唔係有太多野，所以只係煮左鴨蛋炒飯，炒野菜同紫菜蛋花湯。雖然係簡簡單單既炒飯，但就非常好味，而呢餐飯每人只係食左七蚊，低！之後就出發到彩虹橋，原以為會係一條好大好靚既橋，但。。。。算啦！反正今次既目的係黎影油菜花既！好彩決定係呢個禮拜黎，因為時間真係剛剛好，到處都好滿黃色既油菜花。影完相就返旅館休息，半夜聽到出面落好大雨，好彩第二朝又無落！第二朝一早食完早餐就出發到李坑！唔知係咪因為星期日，成個李坑就好似旺角咁，多人到死。最後我地決定揀一D橫街窄行黎行。遊完李坑，又再出發到江岭，呢個先係成個行程既主菜，我第一次見識到乜野叫做花海，成條村都比油菜花海包圍，平時多數見到既都係平平既一片花田，但今次見到既係花海梯田，一級一級的一路伸延上山。真係好靚！影家相，又係時候回家！又要坐返十幾個鐘頭車返深圳！唉~~~~~
P.S. 雖然來回兩程車加埋要坐成差不多三十個鐘頭，但可以見到咁靚既花海。辛苦都係值得既！

露營@雨天的灣仔

呢次露營都已經約左一段日子，雖然天氣唔好，但都照去也~~~
因為姐要返工，所以等埋佢先一齊入。因為我早到左，所以先去買野，跟住大家一齊等個午餐就搭車到黃石，等埋朋友H時已經搭唔到尾班船，咁為有搭快舢啦！個船家一開價就$120，我地有講價，但佢唔彩我地！無辨法啦，$120就$120。去到大叔佢地已經到左，仲幫我地霸左位添！起好營，set好fly都已經成六點，hea左一陣就開始煮晚餐，是日晚餐有煎雞翼同羊架，炒椰菜同白汁長通粉。個羊架實在好好味，總之就買多幾塊啦！食完飯又是飲紅酒傾計，最後又成十二點幾一點至訓。
唔知係咪成晚都落雨，所以訓得唔好，都係臨天光既時候先訓得著，訓到九點幾起身，刷牙洗面後又準備煮早餐。今次既早餐係叻沙米線，除左辣少少之外，真係非常好味！因為要趕搭一點船出返黃石，所以食完早餐拿拿淋洗碗執野，最後用左一個鐘頭就洗完野加執野，勁！

一百萬零一夜

星期二終於都同朋友去左睇今年既奧斯卡最佳電影 -- 一百萬零一夜。故事係由主角參加百萬富翁開始，每答一條問題就令佢諗起自已以前既經歷。 你可以話呢套係一套社會寫實電影，雖然我知劇情一定有D誇張，但相信都有一半係反影緊孟買貧民區既生活。但你亦可以當係一套愛情電影，男主角無論向任何時候就算有幾難都要去救女主角，由細到大都對女主角不離不棄。
睇完後覺得有點無奈，如果要得到呢一百萬係要有咁既經歷，那我寧願唔要！

Hea行@黃泥涌至大潭

上個星期已經聽到朋友V話會去行山，所以一早就約定佢。約左十一點向中環等，點知搭地鐵途中朋友A打黎問今日係咪行山，叫我地等埋佢。咁我地先去食D野先，等到朋友A黎到就一齊出發。先搭6號車到黃泥涌，點知開左車一陣，突然有架的士剷埋黎，攪到司機叔叔剎車都剎唔切。最後兩架車既司機當然就向路上理論啦！而我地就向車上面等第二架車黎接我地。真係出師不利！到達黃泥涌水塘既時候已經見到好多環島行既參賽者向度比賽！今日主要既目的都係行下影下相，加上朋友A途路不停介紹各條橋既歷史同乜乜既建築。其間行到去個水壩度，我地諗住上個壩度睇睇啦！點知見到三個鬼妹仔，佢地見到我地好顎然，咁我地見到咁咪行返落去囉！行到落壩下面既時候突然聽到”噗” 一聲，原來其中兩個鬼妹仔由壩上面跳左落黎。佢地仲叫朋友A幫佢地拍下跳壩既情形，就係咁，佢地三個鬼妹仔向我地面前跳左三，四次，最後拍到相機無電。影完鬼妹我地就繼續行去大潭，最後終於比我地搵到大潭個主壩。行到落壩底又見到一班朋友仔向度寫生。本來我同朋友V諗住去數碼港影日落，但朋友A話今日多雲應該都影唔到，最後一致決定由大潭行返出淺水灣。出到淺水灣大家都hea下食下雪糕，而朋友V亦都唔份氣，就算影唔到日落都希望可以影到雲彩，但最後等到天黑都係無，跟住就出左灣仔食飯。