江西婺源油菜花之旅

上星期五晚跟左朋友去江西影油菜花。放工就即刻趕去上水美心先會合田生田太佢地，之後就當然食個豐富既晚餐。食飽飽就出發到羅湖，等埋小林子就準備上車開始呢個十幾個鐘既漫長旅程。終於向第二朝既十一點到達江西既婺源，真係辛苦我囉！先到售票處去買飛，之後就開始四處玩，同影相。原來婺源既景區係好大，每個點與點之間都要座車既！仲有張入場卷仲好似八達通咁，每入一個景點都要拍一下咭，仲要加上打手指摸，真係高科技！沿途都見到兩邊都係盛開中既油菜花田，真係好靚！到在午飯時間，到處都係人再加上思溪延村呢度好少食市，就向我地四圍搵食既時候，有個老伯伯走黎問我地係咪想食野，於是佢就帶左我地去佢屋企，由於佢地屋企唔係有太多野，所以只係煮左鴨蛋炒飯，炒野菜同紫菜蛋花湯。雖然係簡簡單單既炒飯，但就非常好味，而呢餐飯每人只係食左七蚊，低！之後就出發到彩虹橋，原以為會係一條好大好靚既橋，但。。。。算啦！反正今次既目的係黎影油菜花既！好彩決定係呢個禮拜黎，因為時間真係剛剛好，到處都好滿黃色既油菜花。影完相就返旅館休息，半夜聽到出面落好大雨，好彩第二朝又無落！第二朝一早食完早餐就出發到李坑！唔知係咪因為星期日，成個李坑就好似旺角咁，多人到死。最後我地決定揀一D橫街窄行黎行。遊完李坑，又再出發到江岭，呢個先係成個行程既主菜，我第一次見識到乜野叫做花海，成條村都比油菜花海包圍，平時多數見到既都係平平既一片花田，但今次見到既係花海梯田，一級一級的一路伸延上山。真係好靚！影家相，又係時候回家！又要坐返十幾個鐘頭車返深圳！唉~~~~~
P.S. 雖然來回兩程車加埋要坐成差不多三十個鐘頭，但可以見到咁靚既花海。辛苦都係值得既！