呢陣個個朋友仔都掛住玩水，我呢D唔識游水既就真係慘，所以星期日唔覺意做左朋友J既電燈胆，三個人去左行港島徑，我地今次由第八段既終點大浪灣出發逆行至第七段既起點。因為我地約十點加上食埋個早餐，所以成十一點八先起步，開頭既一段山路都幾好行，只係無乜風，之後接上石屎路，沿途見到好多人黎行下當做運動，行左大約三十分鐘既行路，又再次行返山路，呢段就悶D只係圍住個山腰行，行左差不多成個鐘至見到上龍脊既入口，呢段路開始先叫做有D風景睇，其實天氣好既話係可以見到成個石澳同大浪灣，之後就行返出八段既入口，再過對面就係七段既出口，好彩係決定逆行，唔係要行呢條長命樓梯就慘囉，落完呢條樓梯就開始行入引水道，呢段港島徑七段全段都係磨滅意志石屎路，仲要無景睇無野玩，齋行個半鐘，頂~~~行完倦到死，拿拿聲搭車出西灣河食糖水！
我話過以後都唔行港島徑第七段~~~~
第二朝一早起身先到樓下食個早餐先，之後就Check Out，因為今日有幾個景點我地會去既！所以我地就包左架車，第一位我地先到歙縣棠樾牌坊群，唔知係咪因為星期日既關係，所以成個牌坊都好多人，行左一陣我地見到好靚既荷花池，所以大家二話不說咁就走去影相啦！之後仲順便去埋隔離既鮑家花園，園裡面有好多好靚既盆景，而且有D仲好似拎過獎添！我地又估唔到大少奶個細佬咁後生居然對盆景咁有興趣。因為時間尚早，咁個包車既司機話可以帶我地去一個地方參觀，其實個地方叫乜名就唔係好清楚，只知係一條要收入場費既村莊。睇完之後就搭車去吊車站，咁去之前當然就要食個牛餐醫下肚先，原來由食飯果度去到吊車站仲要搭多程車先到，由山腳搭吊車上山上只係需要大約半個鐘頭，本來諗住會有靚風景睇，點知大霧到嘔，乜都睇唔到！激死！山腳同山上既溫度真係差成十度，一落車就即刻要著返件褸先，之後就先到旅館放低行李，見到咁大霧本來都唔想出去行，但留向旅館又唔知做乜好，最後都係出去，我地遊黑虎松之後再到始信峰同猴子觀海，最後行到六點多至返旅館，太大霧所以連日落都費事出去影，拿拿聲去食個晚餐之後早D訓，祈望聽日有個日出影下！
一朝早check out完就搭車去長途汽車站搭卧巴返深圳，因為唔係太知個站頭向邊度，所以我地預早左成半個鐘頭，見仲有時間就當然去附近食個早餐順便買定乾糧上車食，因為呢程巴士都要搭成八、九個鐘頭。買完野返到去站頭，唔洗一陣架巴士就到，明明旅館既人同我地講話已經劃好位架，點解我地個位會有人既？問返巴士入面既姐姐，佢地話無劃位架，有位就坐啦，激死！咁我地見最後有位，咪諗住算啦，頭半個鐘既車程都好地地，點知過左一陣，巴士姐姐就行過黎開始向度整野，我地都奇怪佢向度攪乜，攪攪下至知原來佢要向兩個床位既中間加塊板做多個床位，我地一聽到就話唔係嘛？個姐姐完全無理我地既意思，繼續向度整野，如果咁樣加塊板向中間就會將我地四個分開，本來有諗過四個一齊訓上面，但怕唔夠地方放野加上對塊板既乘托力好有懷疑，所以最後都係決定四個一齊訓下面，就向我地揀好位執好野，就有人開始上車。唉。。。呢個時候先知呢個係錯誤的決定，因為中間有塊板向度，令上面既冷氣唔可以透落下面，加上車尾既馬達不停咁發熱，我地既位就好似焗爐一樣，而呢個只不過係剛剛開車既一個鐘頭，即係話我地仲要挨多七至八個鐘，死得！點知行多一陣佢又停車，唔係嘛！架車都上得七七八八架啦！仲上多三個人，得返一個位咋喎！個巴士姐姐居然叫個兩母女迫埋一個位，而爸爸就向廁所頂加個位比佢，而呢對母女全程就係咁迫埋想轉個身都難，見到佢地都覺得辛苦，仲諗住行高速就可以早D到深圳，點知中途仲要塞車，天呀！我幾時先可以離開呢個焗爐，最後終於向夜晚既七點多到達銀湖汽車站，之後仲要等佢地D接駁車去羅湖口岸，最終向九點幾返到我溫暖的家，今日全日坐足十一個鐘，死得！
本來上星期日就話跟亞昇哥去行甲龍古道，但落雨落成咁點行呀！最後又改左向呢個星期日行啦！今次既目的地係雞公嶺，因為昇哥話好易行，所以可以唔洗約咁早，明明之前講左話約十點架嘛，點知對左打電話比佢，佢居然話唔係約十一點咩，我仲向屋企喎。最後我地成班人為有去附近食個早餐等佢啦！之後就搭車去逢吉鄉起步，開頭以為昇哥識路，原來係唔識既，激死！最後攪左成個鐘頭先搵到上山既入口，之後就開始向雞公嶺出發，因為昇哥成日講住好易行，所以大家都以為好快就可以攪掂之後去食返個B仔涼粉，點知行完一個山頭又一個山頭到未到，大夥兒又開始肚餓，咁就向路邊開爐煮午餐，行山都仲有美味公仔麵，我都無乜說話好講，食完野再繼續行。原以為會有落山既路，點知沿途望既都係不停咁上，加上當日濕度奇高，又無乜風，全程係咁上，攪到個個意志消沉，最後見到有路落山，大家一致決定打道回府，雞公嶺全條山脊留返下次再繼續，回到文明，大家都拿拿聲搭車去元朗食B仔涼粉！
