迷@黃山之旅 Day 4

咁既天氣，第二朝日出計劃當然要放棄啦！訓到大約八點幾，食個早餐就再到附近行下，我地先到飛來石，之後就再上光明頂，其實沿路一路行都一路落雨，只係時大時細，到我地上到回音壁時D風大到簡直等同八號風球一樣！之後上到光明頂，本來都無雨架喇，點知正想拎相機出黎影相時，個天居然落雨落到澎澎聲，好彩剛剛有個位有瓦遮頭可以比我地避雨咋！最後等左成半個鐘D雨先開始細D，見細雨就緊係即刻返旅館啦！返到去諗住問下姐姐大約幾點有車返落山，點知姐姐話加陣咁既天氣，有機會會停索道。一聽到呢句大家都呆左一呆，於是我地叫姐姐幫我地check下下一班車會開幾點，點知居然係十二點半，但現在已經係十一點半，加上仲要執野同行去車站，但大家都覺得等下一班車走呢個計劃搏唔過，所以極速執野，向"咩"住full gear加上大風大雨下趕路去車站都咪話唔想死！好彩我地向十二點廿五分到車站，因為呢個站比較少人搭，如果趕唔到係起碼等成個鐘，入到候車室已經有一班人向度，等左大約十五分鐘架車就到！向咁既天氣下搭索道你都咪話唔驚，一路行一路搖，行到中間仲停鬼左好度，好彩最後安全落山，再駁返車出市區都成三點，個肚勁餓所以先搵野食，食完野見有時間，又走鬼左個隔離買茶葉既鋪頭睇睇，點知唔睇又自可，一睇每人擺低$$$，我已經係買得最少既一個，只係買左黃山出名既毛峰，其餘團友就………. 呵呵！之後再坐包車入宏村，入到宏村一落車就有成班嬸嬸圍住你買呢樣買果樣，好彩旅館姨姨幫我地解圍咋！去到旅館放底野之時就已經聽到大少奶佢地大叫，原來有小強向佢地間房，好男人豬叔叔立即出手收服小強，說時遲那時快，又到我大叫，因為、因為、因為向房門口居然見到我至驚既……………. 四腳蛇~~~~~~救命呀，第一時間關房門，之後每出一次房門前會極度留意隻衰野仲向唔向度！安頓後見時間尚早，又出去行左個圈，可惜天依然都仲落緊雨，之後食完晚飯就回房休息，大家已經對影日出不再作任何期望！