露營@石龍拱

影完相又拿拿淋返屋企拎背包出動了！去邊？咪就係開季Camp是也~~
約左兩點半向荃威花園等，點知個個都遲大到，最後大約三點半才起步，路程不是太長，只是全段都要上斜路，有D仲要係喪斜，加上full gear同無風，都有點辛苦，最後大約五點多終於都到達石龍拱既X-camp營地，因為得我一個黎過呢度，加上已經五點多，所以我立即提議先去拎水(我唔係太肯定水源位置，只係大約知方向)，我唔想摸黑返黎，好彩老人家記憶還不算太差，十五分鐘就到達水源位，但拎完水又要喪上咁返去！反到營地到係六點！Good~~之後就起營，攪完一大輪又七點了，根住就開始煮晚餐，今次我地決定每人煮一個餸夾食！而我既就係煎三文魚扒！食完飯大家都無乜意慾去洗碗，個個靜係掛住吹水！最後攪到成十點幾先捨得去洗碗，洗完磅又傾多陣計至入營。
第二朝九點幾就起左身！之後就煮早餐，煮完執野就兵分兩路，一邊原路折返，一邊行至川龍！而我就是原路折返路過上星期無上插上國的山頂，今日有時間，所以上埋去睇睇，之後返回荃威食個tea就回家了~~

               

石龍坑

話說” 姣婆” 星期五打電話比我，問我星期六去唔去行澗，好耐無行過澗喇，所以go~~約在大家九點半向荃灣地鐵站等，但我地早左半個鐘到，所以先去食個早餐，食完早餐都仲未見到人地細佬，最後要等到十點先見到佢，仲要臨去小巴站時走鬼左去吉野家買個牛肉飯做早餐@.@，之後就搭小巴到汀九落車，沿石屎路行到一個引水道位既澗邊就上，呢條澗唔算太長，但就好多攀爬位，真係辛苦左我呢個哈比人，大約兩點多就已經行完，但喪人們玩得不夠引，佢地要過埋石龍南石林那邊抱抱D石喎，但你地抱還抱，點解我都要同你地一齊抱@.@，攀完成個膝頭哥瘀晒！喪人們玩石玩到四點半先願意走，之後就由元荃古道回荃灣回家去~~