露營兩週年@昂坪

話咁快又係露營兩週年既日子，本來係去狐狸叫的，都係因為我第二日要好早返出黎影紅葉，所以最後改左去昂坪，約左11點向東涌等，點知得昇哥一個準時，我地先去老麥食個lunch，之後就見到Peter，三個人食完個lunch之後就去超市買今晚同聽日既野食，買好就搭巴士到昂坪。去到行緊入去既時候就見到有架的士向我地既方向入，我地就諗唔係嘛，咁近都要搭的士？入到去已經有一班人向度起緊營，原來係的士班人，我地三個起好營都只不過係兩點幾，於是我同Peter就出左市集買下午茶，買完返黎昇哥就去攞水，點知我地食食下既時候對面有個人走過黎同我地傾計，原來佢地成班都成日去camp，佢地主要去hea camp，每次去都係為左煮野食！傾左一陣就走左。我地三個向度傾下計吹下水之後，就開始準備今晚既晚餐，當我同Peter入去廁所洗菜既時候，有一班o靚仔o靚妹問我我地入面仲有無位，我地就話得返最底既一層，之後又問夠唔夠扎一個八人營同一個二人營，我會都夠既，之後佢地向門口商量左一陣就行入營地睇(我心諗，你地明知咁大班人就搵人早少少入黎霸位啦！衰D講句，無位你都要搵位扎啦係咪呀) 之後洗完菜我地就返入營地，遠處已經見到班o靚仔對我地既位望望貢(因為我地三個營霸左兩格位) 班o靚仔真係走埋黎問有無位，我地話無喎，我地仲有朋友入緊黎。之後佢地先死死地氣咁走開！大約六點多D，河生河太同大姐先入到黎！今晚晚餐打邊爐，正(真係要多謝河生河太既小肥羊~~)，烚下烚下又攪到成十點，咁我地就去洗碗，點知去到廁所，成個面盆都比D飯塞住左，去唔到水，無野呀！有D公德心好喎！唉~~~加陣D妹妹仔，攪到我地要用另外一個黎洗碗，執好野大家又坐向度吹下水，一吹又成兩點幾至訓。
因為要趕返出去影紅葉所以第二朝七點幾就起身，起身既時候個個都仲訓緊覺，執好野都係八點到，見咁早，坐向度等又凍冰冰，不如出去影下無人既大佛同市集啦！