唱K三人組

  
今朝同完我對寶貝行完山之後，我又出左去同奶奶和表妹唱K。今次唱K已經約左好耐(其實最主要係就我一個，因為我成日都唔得閒，所以佢地兩個禮拜前已經約定我)。我地約左兩點向旺角等，本來諗住食完魚麵去唱K，但又怕太多人，所以都係上去卡拉OK度食下午茶算！唉.....每次去親唱K，D新歌試唱既頭十頁我最多都係識一兩首(因為我鐘意聽國語歌多D)，但唱國語歌又有好多佢地未必識，所以我都唔係成日去唱架！不過同佢兩個一齊就唔同，因為佢地都有聽國語歌，有時我揀D冷門少少既歌手佢地都識！所以我最鐘意就係同佢地兩個去唱歌！今次只係唱得個兩個半鐘就要交房，大家都覺得唔夠喉，要約過下次再唱！

同對寶貝行青衣自然徑

                  

                  

                  

                  

今朝一早，我就同一對寶貝去左行青衣自然徑。七點幾就起身，首先第一件當然就去飲過茶，食個飽先啦！之後就向青衣自然徑出發，呢條路我對寶貝差不多日日都行，今次就由佢地帶我行啦！呵呵！點解咁早個太陽伯伯就出黎架！成條路都無瓦遮頭，好在有聽媽媽話帶左帽，唔係個頭煎蛋都得喇！估唔到平時好冇耐性既爸爸，今日都有陪我一路行，一路影，佢仲專登帶我去行D可以影到靚景既地方添，又會話我聽邊樹有蝴蝶影！哈哈，今日既爸爸真好(平時都好，今日更好)！雖然只係行左個幾鐘，但我地三個都晒都黑蚊蚊！唉......七月都未到就已經曬成咁，遲D點算呀！