大埔九龍坑山

今日約左ahmok去行山，唉.......三十幾度仲走去行山就真係傻傻地。約左向大埔吉之島等，之後就出發。行上九龍坑山既呢段路其實都幾難行，因為呢段路係全無樹遮頭，加上上斜既石級都幾大，大大個太陽照到應一應，如果我自己一個行的話，我諗我一早就打左退堂鼓。好彩，只係呢段路行得辛苦，其他都好容易行。大約十二點多我地就上到發射塔。休息一陣，食過午餐就沿住流水嚮水塘行至鶴藪，再行去沙螺洞行去鳳園。其間我地就向條澗邊休息，ahmok照舊都要去沖過涼先舒服。我就向澗邊洗過面降下溫。之後我見ahmok係咁舉起相機向D樹葉係咁影，原來佢影緊支支太陽，於是我就叫佢教我影。但唔知點解我影來影去都影唔到。影左咁多張先得一兩張OK，但ahmok就張張都靚靚！玩完一輪我地就出鳳園。本來諗住去埋鳳園打蝶架！但真係太倦，加上ahmok有事要趕返屋企，所以決定下次先再去鳳園打蝶！

罾棚角咀

今日跟左travellife既朋友仔去行山，但一朝日就見天文台掛左一號風球，出左西貢至算啦！八點半到西貢，其間攪手問大家咁既天氣仲行唔行，個個都話繼續。向麥當勞食過早餐之後就搭街車去西灣亭。等埋另外兩位帶狗狗既朋友，向西灣亭影過大合照同著好晒雨衣就出發。好左落左一陣雨就停左，上到西灣亭大家休息一陣，又同狗狗玩左一陣。有人提議不如上埋魚岩頂，個個都OK咁又出發。上到魚岩頂影完一輪相，大家本來應該由原路走既，講講又話不如去埋罾棚咀角睇。但呢個時候其實個個都有D倦，不過黎到就無理由唔去架，頂硬上！下午三點鐘，我地成功到達罾棚咀角。終於可以享受我個腸仔飽午餐。食完野大家小休一陣又要起程。因為我地仲要行過浪茄仔，浪茄先至到萬宜水庫東霸搭車出西貢，攪手話預計要行一個半鐘至出到去。好彩回頭路唔係太難走。只係由浪茄仔行去浪茄既其中一段路係縣崖，過左呢個位以為會好D，點知行出萬宜水庫東霸既路仲要上山。努力！加油。點算半路又落大雨，個人已經倦，仲要趕路唉.........最後五點半終於完成今日既行程。

(其實我地今日條路無行得咁多架！只不過大家一路行一路咁加景點所以至行左七個半鐘。好彩今日唔曬咋！唔係都唔知點算。仲有隻狗狗好勁呀，由頭帶到尾！)

大埔滘自然徑+研習園

今朝一早八點鐘就到左大埔！因為應承左同ahmok去飲早茶，之後就去行大埔滘自然徑+研習園打蝶！ahmok同莫太真係太客氣，係都唔比我地比錢！多謝晒。飲過早茶就出大埔火車站等埋其他朋友仔一齊出發。呢段路一D都唔難行，而且我地仲可以一路行，一路影相。我，亞Sam同bbop三個就係咁向樹影！ahmok就好似做左我地既攝影指導，不時教我地用咩光圈快門去影。(我地就影得好起勁，不過就可能會悶親其他唔影相既朋友仔)。原本要行個半鐘頭既路，我地就行左差不多兩個幾鐘。之後佢地就行返出大馬路。我，亞Sam同ahmok就去研習園繼續打蝶。原來研習園入面已經有好多人向樹影緊相，佢地個個都好似專登黎影蝴蝶同昆蟲咁。因為亞Sam相機無電，我地留左一個鐘度就走，仲決定下次要再黎過呢度打蝶添！

梧桐寨半天遊

今日又同表表既西藏團友去行山，目的地係梧桐寨。之前佢地個個都已經話梧桐寨好靚，所以今次決定帶埋寶貝D50去行山。我地約左九點鐘向大埔火車站等，再搭64K去梧桐寨。向巴士站等埋方仔就出發，今次呢條路唔係太難行，首先我地去左井底瀑，未落到澗邊已經聽到好多人聲，落到去就見到有好多人玩緊水。就向大家拎晒部機出黎影相既時候，天突然間落雨(點解近呢幾次行山都落雨架)我同傑哥第一件事就緊係澎澎聲收機啦，淋濕左點算！收好機就繼續向中瀑出發，但越行就越大雨，不過去到個瀑布又真係好靚，忍不住都要拎部相機同佢影返兩張先得。最後見仲係咁大雨，所以大家都決定打道回府。返大埔食個靚Tea。可以今次時間早啦！大家食完野都唔趕住走，由傾下大家下個月既旅行大計，到計劃下年復活節向沙巴神山出發。一傾就傾左個幾鐘。呵呵~~~~

(期待傑哥玲姐九月中北疆之旅同釗哥九月尾摩洛哥加撒哈拉沙漠靚相)

Travellife三週年會慶

 
今年係第一年參加Travellife會慶，之前就約左ahmok佢地向旺角等，因為佢要幫hapmorn買相機配件。ahmok一見到我就話我咁大手筆呀！佢仲話叫我早D同佢講，佢可以幫我問下相熟既鋪頭可唔可以再平D！點知唔問都好地地，一問之下居然平左成$600(唉......算啦！唔買都買左)之後我地一行人就上左Cafe，上到去都未有太多人，我地就幫手包下禮物。大約七點鐘就開始。因為今次佢地分晒組坐，好彩同我一組既有小林子，亞Sam同佐敦。hehe~~咁都好D唔會咁悶！一開始就玩下小遊戲，等自己個組既人各自認識下自己組既組員。玩完遊戲就食自助餐，其間有其中一個組員帶左佢去歐洲旅行既相比我地睇，冰川好靚，我幾時先可以衝出亞洲呢！食完野就緊係抽獎時間，都無諗住會有架啦，點知又聽到自己個名，呵呵！係呢間Cafe既九拆咭。出去拎禮物時要影合照，死佐敦第一件事就叫我企前面賤人~~~抽完獎，又到網主Billy同大家講幾句野！最後當然唔少得大合照啦！(好期待呢張有成一百二十幾人既大合照會係點呢！唔知需唔需要搵放大鏡至搵到自己個樣呢)