鼠年新春大露營

呢個鼠年既天氣咁凍，但我居然仲去露營，哈哈......你話我係咪傻？
初二約左向十二點西貢等，但大叔居然遲到，好彩我地醒目食住午餐等，如果唔係我地一定向巴士站度等到變雪條。齊人就出發去買野食同用品！買完野就去搭小巴到白沙澳。落左車仲要行大約四十五分鐘先到枝莊。拎住咁重野行入去都咪話唔辛苦！去到枝莊都差不多成四點幾。大家起好營，齊好野都已經入黑。呢個時候就開始食晚飯，咁凍既天氣當然最好就係打邊爐啦！呢餐邊爐就豐富囉，有肥牛，羊肉，雲吞，水餃，粟米，菜等等.......食飽飽之後仲有個湯丸做甜品添呀！休息左一陣之後，我地就起左個營火，大家一齊圍住個火飲住紅酒一邊傾計。大約傾到兩點，大家就返營訓覺，但唔知點解每次去Camp都唔眼訓既我又再次捉左老豆傾計，傾到咁上下大叔出左黎，佢太凍訓唔著，原來個陣已經係四點幾！本來諗住傾多一陣就訓，點知傾下傾下最後我同老豆傾到成六點先返入營訓。
第二朝九點幾又比大叔向隔離嘈鬼醒左，可憐我尋晚訓得三個鐘咋。今日仲有好多人入黎，首先有Jmy同Kannie入黎探班煮lunch，食完飯之後我地就去左附近四圍行下，之後就去左碼頭接童童同佢男友入黎，最後就係去車站接乖仔。等到乖仔入到黎都已經四點幾！食個tea之後hae下，又都晚餐時間。今晚晚餐五一湯。有番茄炒蛋，雜菜丸煲，油墨菜炒豆鼓魚，煎牛扒，蒸臘腸同忌廉湯。其間朋友仔唔知係咪飲醉左，成晚呆呆咁，問非所答。勁攪笑！食飽飯又再來營火晚會，可能尋晚玩得太夜，所以今晚我地玩到點幾就訓！

唔知係咪太倦，所以今朝訓到成十點幾先起身。刷過牙洗過面就煮早餐食，食完野執下野，咁就成三點。我地執好野就搭船出黃石碼頭，之後就去在西貢食tea。

就係咁呢個三日兩夜既露營又完結了！唔知下次又幾時呢？