探營@大帽山

星期六晚老豆好地地打電話話比人地聽大帽山夜景有幾靚！跟住又叫人地星期日入黎探營，探咪探，驚你呀！一早起身食過早餐順便去超市買埋午餐就搭車去荃灣再轉車去大帽山郊野公園，估唔到成十點都仲咁多人搭車，好彩向總站上車。落車之後根據老豆既指示向上山既路出發，沿路都有唔少人行呢條路，所以得我一個女仔都好安全，行到咁上下老豆就打黎問我行到邊，我邊知知得架！最慘仲個電話仲要收到唔清，最後仲斷左線。好彩我識得send短訊比佢叫佢出路口等我，唔係我都唔識向邊個位入。去到個營地當然就先探一探個貪慕虛”營”先啦！因為時間尚早，所以兩父女坐向fly底傾下計吹下水，就向呢個時候見到有班著晒製服既人行過黎，老豆立時心知不妙，因為呢個位唔係合法營地，比人捉到就唔見$320，好彩係警察，唔係漁農處既人，只係叫佢快D收返隻營就算。都算有驚無險。最後食過午餐就執野行返落山！

露營@狗嶺涌

秋風起，又是露營時，今次露營既目的地就係大嶼山既狗嶺涌。約左兩點半向東涌等，買好晒野就去搭車入石壁，之後沿大路行入營地。其間撞到兩個又是來露營既人，佢地係由狗嶺涌行返出黎，佢地話因為入面好多垃圾同D草好長，所以決定搬去南山營地，就係咁我地就向度諗改唔改營地，最後大家覺得唔入去望過唔心息，所以都係照入。行到入去見到有個觀景台，就順便行埋入去睇，原來呢度就係大嶼山最南面，咁又見到靚靚日落，勁有天涯海角feel。落到營地已經有一班人向度扎營，之前個兩位人兄講得無錯，但都已經無辦法。搵好位就開始起營set fly，攪掂好晒就開始煮飯，今晚四一湯，白飲任莊。食飽飽洗埋碗大家就搬張仔出沙灘傾計，傾到差不多成點幾鐘至返入營訓。

第二朝起身，食過早餐，執好野就諗住行入分流後再行山大澳，行到分流古堡，烏蠅幫三人想入內參觀，以其他人就先行到分流村等。當我地入村想買冰凍氣水時，咁又撞到分流村村長，佢除左好好人買汽水比我地之外，仲話可以開船載我地出大澳，我地五個懶人就緊係好啦！而烏蠅幫就決定繼續行返出去，最後相約大澳會合。到左大澳，第一時間就緊係去食個tea啦！行行下突然有人叫我，原來神山小隊剛剛行完山向大澳買海味，經佢地再三邀請，最後又跟左佢地出東涌食海鮮，好滿足既兩日！

船灣淡水湖環湖行

今日行程：新娘潭-->烏蛟騰-->馬頭峰-->橫嶺坳-->大峒-->觀音峒-->鹿湖峒-->長牌墩-->大尾督。
全長大約17km，行左8.5個鐘，好甘。
為左11月尾既玉山之旅，團友們又再次出黎練習練習，今次既行程就係之前已經聽人講過話好難行既船灣淡水湖環湖郊遊徑。約左八點半向大埔火車站等，一齊食過早餐之後就再等埋其他團友仔，跟住就搭車入新娘潭。一開始既時候無乜風，加上又係上斜同樓梯既路，都幾辛苦。我地比原定時間遲左到大峒，為左唔想天黑至落山，所以大家都加快腳步，行到鹿湖峒大家都來個大休加食lunch，好彩之後既路都係好短既上上落落，但呢條路都唔易行，因為有成11km先到大尾督，大家努力！最後向下午六點終於都行到落大霸。以為有好日子過，點知由大霸行出大尾督，呢段石屎路真係行屎人。行完呢條長命既環湖徑之後，大家即係去酒樓食返餐勁既！
P.S.好彩今日膝頭尚算聽話，全程只係忍忍作痛，係最後落霸先黎料！

沙巴神山之旅 Day 7

(回程時大背包有成12.6kgs重)

(大家都仲向講緊神山之旅既趣事)
起身刷牙就開始執野，因為今朝搭十一點四十分既飛機返香港。本來約左司機約左司機九點半向旅館下面等，點知要去到十點三先黎到，去到機場拿拿淋check in先，攪得黎都成十一點，跟住佢地爭取時間去買急凍海鮮返香港，買完已經唔夠時間再買雪條喇！今次架機好滿，唔可以好似來既時候咁每人坐一行咁嘆喇！最後向大約二點幾就返到香港喇！七日既沙巴之旅就係咁完結喇！

(OK好食既飛機餐)

(再見喇，沙巴既藍天白雲)

尋找短咀營地一天遊

是日行程：北潭凹-->赤徑-->大浪凹-->蚺蛇凹-->米粉頂-->short cut至短咀-->東灣-->大灣-->大浪凹-->赤徑-->北潭凹。共行左八個鐘，隻腳痛返，"屎"得！

重陽時節，又是登高之時。今日跟左老豆由北潭凹行出短咀，約左八點鐘向鑽石山地鐵站等，先去食早餐，之後就搭96R去北潭凹。十點鐘開始起步，行到赤徑，先去探一探營先，因為有朋友仔尋晚已經入左黎赤徑Camping，探完營之後就繼續行程，行至大浪凹已經無晒氣，再行上蚺蛇凹時簡直有D想死既感覺(其實條路唔難行，但唔知點解覺得咁辛苦) 。本來有諗過唔行出短咀，不過最後都有行到過去，其實今次出短咀最主要既目的係要搵個營地同水源(雖然我知自已短期內都唔去得呢個營地) 搵到之後就大休食下野。好彩老豆搵到條short cut唔洗行返出米粉頂至落東灣，如果唔係都唔可以八個鐘頭行完。

P.S. 隻死人腳又痛返，要努力拉筋至得，唔係十一月就慘囉！

沙巴神山之旅 Day 6

(好味既海南雞飯)
因為有部份團友想玩激流，而有部份團友唔想咁玩，所以就兵分兩路，一隊去玩激流，一隊就去hea hea買手信。而我就當然係hea hea買手信啦，激流組九點鐘就已經出左門口。而我地就訓到飽飽先出門口，首先就去食沙巴出名既海南雞飯，個雞好滑個飯又好味，之後就去左買手信，先去買肉乾。本來大家都打算買豬肉同雞肉，但當老闆拎左D煙肉出黎之後，個個都轉晒軚買煙肉乾。但老闆無咁多存貨向度，就話即刻幫我地燒，今晚送去旅館比我地。買完肉乾就殺入超市買肉骨茶，”kaya” 同沙巴茶葉。

(又是買手信時，桂花肉乾好味)

(就係呢架車接我地去睇長鼻猩猩同螢火蟲)

(當日天氣好靚，個倒影都好靚)
買完就返旅館放低D手信，坐一陣又出發去睇長鼻猩猩同螢火蟲。去到碼頭我地先食一D當地既茶點，之後就上船出發去搵長鼻猩猩，我地非常好彩，第一隻見到既就已經係長鼻猩猩喇！之後再見到既就係其他猩猩，大約坐左個幾鐘頭船之後就返到碼頭，但呢個時候剛剛日落，於是我地要求船家可唔可以再開船出去比我地影日落，而船家都好好人。影完日落就返碼頭食晚餐，食完後又再坐船出去睇螢火蟲。一出到去就已經見到成樹都係螢火蟲，十足十一棵聖誕樹咁。但呢個時候有一樣野比螢火蟲更吸引既就係，我地居然見到滿天星星，好靚好靚。睇完之後就搭返車出市區，而我地亦都求司機向路邊停低比我地影星星，雖然個個都無帶腳架，但都唔理喇！影得幾多得幾多。其間我地又向度玩電筒寫字，影到咁上下，大家又上車，跟住就收到激流組既朋友電話，原來佢地已經到左市區，最後大家又再相約海王城再來一次海鮮大餐。

(食個茶點，等上船)

(長鼻猩猩呀~~)

(回程途中)

(水中日落)

(星雲呀…可惜當時無腳架，呢張係放向車頂上面影架)

(個天好黑，滿天都係星，真係好靚)

(最後仲玩埋電筒寫字呀)