大城石澗

星期六終於都有得玩水喇，今年第一次行澗。約左九點半向荃灣等，點知正當我想打電話比朋友既時候先發現跌Q左個電話，頂~~黑仔都震~~咁就求其去是但一間茶餐廳食個早餐啦！好彩向度撞到朋友咋！食完早餐去到小巴站等左一陣就齊人，上到城門水塘行左大約四十五分鐘既石屎路就開始入澗，下游尚算平媛，唔難行，只係天氣比較熱，所以大家行左一陣就要浸下水，大約行到一點到，去到大休位，大家就開始煮午餐，今日既午餐好豐富。有公仔麵，英國帶來的好味香腸，水餃牛丸雜菜湯！最後仲有山澗茗茶同冰凍可樂~食飽之後大家又一路浸水加吹水，唔覺又hea左兩個幾鐘，之後又繼續上朔，但中游開始就多攀爬位，所以大家都走得比較慢，中間都有休息玩下水，但都唔敢玩太耐，因為唔知仲要行幾耐至到出澗位，但行左個幾鐘都未見肥佬麥，大家都有懷疑可能己經走過左，再搵過地圖出黎睇，最後決定再行前D睇下點先，好彩行多十五分鐘就見到肥佬麥喇！之後就沿山路行返出城門，唔知係咪大家體力下降，定係行完澗放鬆身體，先是田太唔小心跌到，之後Sa姐仲抝柴添！見到佢坐向地下個痛苦樣，我地都好擔心，等佢休息左一陣，等隻腳無咁痛，先繼續行。豬叔沿途扶住Sa姐行，我地就一路慢慢行有個照應。最後行到出城門都八點囉。