我和嘉明湖有個約會 Day 1

哈哈！終於都到左出發去嘉明湖既日子，因為搭八點三飛機，一朝早五點幾就起身，最後六點八到達機場。時間已經有D趕架啦！居然仲有人遲到，好彩之前一晚做左網上check in咋，唔係都唔知點算！

去到台灣機場都只不過係十點多，搭過飛狗大巴去台北火車站後再轉的士去酒店放低行李先，攪完都已經係午飯時間，本來諗住食鼎太豐小籠包，但實在太多人，所以先拎左個籌之後就走左過隔離食冰。食完冰再過返去時間剛剛好，又有小籠包食！呵呵~~

食飽飽又過隔離既金石堂書店打書釘。打完書釘後又緊係再食過啦！今次就去度小月食擔擔麵，食完先返酒店check in。放好晒行李向房後，我地就搭捷運去淡水，本來大家都滿心歡喜諗住去影日落，點知天氣唔好係其一，其二係居然台北咁早日落，五點半去到淡水都已經天黑。一場黎到就順便行下淡水老街同買下手信，跟住就返出台北，因為今晚約左豬叔叔既台灣同事一齊食飯，佢地介紹既呢間快炒真係幾好食！之後就返酒店休息休息。