三日兩夜走營@黃竹角咀

Day 1 烏蛟騰--->馬頭烽--->橫嶺--->大峒--->觀音峒--->鹿湖峒--->紅石門Camp

Day2 紅石門--->烏洲塘--->鳳凰笏頂--->白角山--->昂莊山--->大嶺Camp

Day3大嶺--->落鬼手-->call大飛回黃石碼頭

襯住五一連住有三日假期，大家一致決定黎個三日兩夜大長途camp，目的地就係想在好耐既黃竹角咀！
約左十點鐘向大埔火車站食早餐，之後就分三批人，一批去街市，一批去超級市場，另多一批就向度睇住八大個背包。買好晒野就搭車入烏蛟騰，之後就沿住船灣郊遊徑行，難得今日咁好天，加上大家都話帶大機，所以我都帶，除左大機之外仲帶埋塊fly(真係唔識死啦！大熱天時行環湖都帶咁多野！) 開頭段上斜路都尚算OK，有少少樹蔭遮下，但越行就越少樹蔭，加上pack錯左個背包，成個包好重，越行就越辛苦。上山路又係禿頭山，而且仲要係最晒既鐘數，所以全程都行得好慢，大約四點就行到落紅石門既分叉口，過多一個鐘頭到就到達紅石門村，原以為會無人啦！點知一行入去就已經見到有成五隻營向度，原來係一個大家庭黎呢度露營，細問之下佢地耐唔中到會搭船黎呢度Camp，之後壯丁們就去左搵水源拎水，而我就留向營地幫手起營。大約一個鐘後，壯丁們拎完水返黎，就開始煮飯，食完飯洗埋碗，又是飲紅酒吹水時間，之後再出海灘果面睇星添！(原以為呢個大家庭成日去露營應該會識點樣愛護大自然，但………. 成晚比佢地激到一肚氣) 因為行得好累，最後大約十二點就訓。

第二朝八點幾就被隔離班叔叔嬸嬸嘈醒左！煮好早餐之後就開始執野向今晚既營地大嶺出發，因為大家都擔心大嶺條水好弱又或者搵唔到水源，最後一致通過向烏洲塘開始揹水到大嶺，計過要煮今明兩餐同飲用水後大約需要20L，於是四位壯丁們就每人各揹5L水，而四位女生們其中一位揹2.5L食用水作沿途補給，其餘三位就揹所有食物，本來諗住經過一晚食左咁多野，個包應該會輕左，點知…. 好彩今日經高人提點，重新再pack過個包，今日的確比尋日好揹好多！因為我地要由烏洲塘上返鳳凰笏頂，點解每次要上大斜路既時候都要係最晒既？？經過兩個多鐘頭，終於上到鳳凰笏頂，咁我地就決定向度大休，呢個時候我張自私的fly終於都大派用場，開頭都覺得帶多左，宜加簡直係救命fly，食完午餐又繼續出發，好彩之後既路上落唔係好大，終於向五點度到達大嶺營地。真係辛苦晒四位壯丁，唔係你地我地會無飯食！大家set好營，影埋個靚靚日落，又係煮飯時，估唔到向要揹水既情況下，我地都有三一湯，白飯任莊，真係幸福^o^食完飯，洗埋碗，唔夠十一點個個都返入營訓，因為第二朝要影日出。

較左鬧鐘五點半，起身既時候天都已經光晒，而其他朋友亦都陸陸續續起身，就向我影緊其他野既時候，個相機突然間影唔到，影出黎既野都係黑色，問朋友仔佢地都唔知發生乜事，激死，點解偏偏向人地影日出既時候先黎壞機，好彩我都有帶部DC仔，唔係就影唔到黃竹角咀既日出。影完日出大家又返營訓多陣，其實入到去都訓唔返，最後都係出返黎吹下水，順便煮早餐，食完早餐執埋野就向今次旅程最後一個目的地--鬼手出發，先要由營地落返海邊，雖然只係大約三十分鐘既路程，因為條路太斜加上粗身大細，所以我地都行左差不多九個字至到海邊，黎到呢度都仲要綑邊至去到鬼手，最後綑左二十分鐘，終於都到鬼手，我地就向度影下相，玩下水等船家來，大約兩點，船家準時到達，就係咁我地就坐大飛返黃石碼頭，完成呢個三日兩夜黃竹角咀走營大長征之旅。