Hea Camp@荃錦

經過上個星期既大長途X-camp後，今個星期就當然唔行啦！黎個hea camp順便玩下玩具，本來諗住去大嶼山既籮箕灣，但吉蒂話放工唔識入，所以最後去左荃錦。我同域奇先約一點鐘向荃灣等，之後就去街市買野，買向野就去如心廣場搭車到大帽山郊野公園，落車行十分鐘度就到營地，非常方便。今次我地揀左最高既位黎起營，set好晒野就去對面既廁所拎水順便去士多買冰凍既汽水。攪好晒所有野就開始整我地既下午茶，自家製既薯餅！我地自已買薯仔壓容再煎，好味！大約七點到吉蒂就黎到，咁我地又準備我地既晚餐，今次既晚餐係鐵板燒，呵呵~~~豬頸肉好味，蝦蝦又好味！食完都已經成十一點囉，因為上手既朋友仔執落一大堆柴枝向度，域奇又點會放過呀！是夜又再次camp frie，傾下講下又成差不多零晨三點至入營，入到營又訓唔著，之後仲聽到出面落雨添！最後濛濛瀧瀧大約到五點幾先訓得著，一訓就到十點先起身，洗完臉就再去拎水，之後就開始煮早餐加午餐，早餐我地再來一次XO醬煎腸粉，呢個真係好味，午餐就係雞扒飽加沙律，估唔到燒肉汁配沙律原來係好好味架！洗完碗執埋野就走喇！
P.S. 今次女子組hea camp試左好多新既野食，期待下次hea camp試玩焗蛋糕！