露營@牛湖墩

初二三放假無乜野做，又去鬼左去露營。因為初二大家都要食開年飯，所以就約左三點向西貢等。之後就去街市買野，天氣咁凍就緊係打邊爐最好啦！買好晒野就去搭巴士，唔知係咪人人都去拜年呢，所以平時好多人搭既94號，今日居然無乜人！去到營地又係居然無人，唔通真係個個都去左拜年？起好營見有D肚餓，咁就煎媽媽整既羅白糕啦，新年點可以唔食羅白糕！食完糕，另外兩位遲黎既朋友仔都到左，等佢地都set好營我地就開餐囉！是日晚餐打邊爐，大家烚下烚下又食左兩個鐘。可能天氣凍，所以就決定起個營火黎取暖，我地就拿拿淋去附近執柴，之後就向燒烤爐上起火，大家一邊傾計，一邊飲酒。咁又攪到成兩點先訓。
第二朝起身，天氣仍然係咁凍，大家刷過牙洗過臉又是食早餐時。是日早餐係烘麵包加餐肉麵。因為之前行山又整親隻腳，所以無跟其他人去行山，就當我行返出去路口既時候，突然間見到有隻唔知乜動物向樓梯位跑過(都幾大隻下，感覺呢隻唔係牛，唔知係狗定野豬??????)好彩佢跑開佢無返轉頭，唔係就嚇死我！

崖上的波兒

初一個日無野做，就同左表妹仔去睇崖上的波兒。(好彩之前一晚上網買左飛，如果唔係實無得睇！hehe~~)

呢套崖上的波兒的確係比之前幾套既宮崎駿卡通淺易，加上又係有一個我地熟識既故事”入魚公主” 做主題。故事除左帶要愛護海洋呢個信息之外，仲比多一個信息比我，就係愛要勇往直前，好羨慕波兒為左中介可以不識一切要變成人類咁同中介一齊，或者你會覺得五歲既小朋友點識得乜野係愛情，但有時小朋友們做既野先會最直接，鐘意就鐘意，唔鐘意就唔鐘意，唔會拖泥帶水。我諗呢一點已經有好多大人都做唔到！

年三十、分流行

年三十個個都向屋企準備過新年時，我就走左去行山！哈哈！
約左八點半向東涌等，之後就先去食早餐。見我地五個人，搭巴士同搭的士都係差唔多價錢，所以就搭的士去石壁。去到石壁先要行大約一個鐘頭既石屎路，呢段路真係悶死！跟住我地就行左去嶼南界碑，呢個位影日落真係無得頂！行完界碑我地就繼續出發到分流古堡，去到古堡大約十二點半，咁就黎個大休先，順便食下野。半個鐘頭後又再出發，但我隻痛腳又返黎囉！好彩沿路都唔算難行如界唔係都唔知點算。行行下見到前面有堆石向樹，以為無路行，咁就轉左向上面樓梯位行，點知行到咁上下點解好係入左深山咁既，最後仲要無路，原來我地行錯路，誤打誤撞行左去二澳瀑布，哈哈！咁當然咁難得既機會就個個都拎機出黎影啦！沿返原路行返出去，原來之前堆石個條路先！最後我地三點半度行到出大澳，仲向大澳食埋個tea先去！

我和嘉明湖有個約會 Day 7

今日就走，所以行程主要都係hea，所以就訓到成九點幾至起身，落下面食個早餐就返房執野，之後就再行李寄存向旅館就四圍行，首先第一件事當然就係買手信啦！第一個目的地係買八仙果，其間行行下見到有間Birkenstock，我同lulu兩個為之瘋狂咁即刻行入去，就係咁終於比我搵到童裝既人字拖，哈哈，雖然都幾貴，但向香港真係搵唔到，加上前幾日行得咁辛苦，就當獎比自已完成創舉既禮物。之後就再我地落左去西門丁，先去食鹵水鴨，之後再食阿宗麵線。食飽飽就兵分兩路，一邊去行書店，一邊再戰Outdoor鋪。之後向永康牛肉麵店集合，最後再戰Outdoor鋪既朋友個個都滿載而歸。哈哈~~~食完麵就返旅館拎返行李到機場。七日既嘉明湖之旅亦都就此結束！

我和嘉明湖有個約會 Day 6

訓醒仲諗住雙腳會好痛，話晒尋日都行左成十幾個鐘，點知又無事喎！食個早餐，執好野就準備落山喇！今日既路程就簡單好多，只係由向陽山屋行返落登山口，大約只需要兩至三個鐘。最辛苦既一段路已經行完，所以落山時個個都行得好輕鬆，而且仲一路行一路影相，我地真係好好彩，呢三日都好好天，日日都同藍天白雲玩遊戲。仲成日都有機會見到雲海，學同行既朋友仔話齋真係睇到有D厭。呵呵~~~~返到登山口我地就搭車去浸溫泉。行左三日山當然就要嘆下啦！浸完溫泉食埋午餐又是漫長的車程，我地由台東搭巴士返台北大約要六個鐘頭車程，所以返到台北就應該係晚上九點到，咁長車程仲有乜好做，當然係訓覺啦！斷斷續續咁訓，大約六點多司機就向一個類似中途補給站既地方停低比我地食個晚飯。最後返到旅館已經係九點多，Lisa一早就向旅館等我地。放低行李我地又準備出去士林掃街，之後仲行左一陣夜市，不過真係太倦喇！我無跟佢地去食宵夜。自行返旅館。

我和嘉明湖有個約會 Day 5

零晨兩點起身，好鬼凍！食過早餐大家再執好個輕便背包後就準備出發到嘉明湖。唔知係唔夠精神，總係覺得行得好辛苦，行幾步就要休息下。佢地見我行得有D辛苦，好好人咁幫我分擔左背包既重量。仲話我可能有少少高山反應，所以拿拿聲叫我食藥，食左藥感覺好係好左好多。行到向陽山口，都差不多日出，所以個個都希望可以趕上向陽山影日出。好彩大家都趕得切，第一次睇住個咸蛋黃由水平線上升起，再加上四周既雲海，簡直超靚！辛苦都值得！

影完相又繼續行程，行到大約佛九點到，我地就行到避難小屋。休息左一陣又再繼續，跟住就行到三叉山口，本來大家都唔想上山，因為太倦，但又覺得一場黎到無理由唔上，所以最後都與決定上，唔知係咪真係太倦，每行五步就要休息，感覺好係行極都唔完。上到山頂個個都訓晒向度。但唔可以休息太耐，因為我地要向十二點前行到去嘉明湖，如果唔係回程就唔夠時間。(因為我地要原路行返轉頭到向陽山屋) 最後終於向十二點親眼見到嘉明湖。去到個個都無胃口食野，帶去既即食飯都無煮黎食，靜係食麵包同蛋糕。

大休過後，又是回程時。當大家都知道仲要行多幾個鐘頭先至可以返到向陽山屋都無乜心機，只有努力繼續密密行。可能都係行返同一條路，所以周圍既風景向之前都已經影過，回程既時間的確係比來時快，但相對體能亦都開始下降。雖然沿途大家都無乜影相，但當見到日落既時候，個個又拎部相機出黎係咁影(當時既我已經無乜氣力，所以無影到相) 天開始黑，又凍加上個段路又係四周都係樹。短短一個鐘頭既路，就好似行十世都行唔完。最後終於向下午既六點鐘返到向陽山屋。今日總共行左十五個鐘！痴痴地架~~~
好彩返到去poster們都已經煲定熱水比我地取暖，休息過後又是食晚飯。因為實左太倦，個個食完飯執好野都即刻走去訓覺覺豬！

石芽北脊

是日行程---先上女婆山探純陽石，再上梅子林，後行石芽北脊經水牛山返回瀝源。
約左九點半向廣源等，之後就去食個早餐先，點知食完早餐喪人們先剛剛到，咁我地為有四圍行下等佢地啦！之後我地就出發，行到分叉路口，領隊喪人話不如先上女婆山睇一睇純陽石，大家都無所謂啦！但慢慢開始發覺唔對路，路越來越難行，最尾仲要手腳一齊來。我地上到山頂真係要休息下，但喪人們居然仲擒上隔離舊大石度影相，佢地真係精力充沛。之後就經梅子林行上石芽北脊絭沿路都好斜，好多時都要用手借力上。上到石牙位當然來個大休先啦！之後就一個山頭過一個山頭咁行，本來諗住行到黃牛山，但唔夠時間，最後我地向水牛山落萬里長城行返去廣源！