露營@牛湖墩

初二三放假無乜野做，又去鬼左去露營。因為初二大家都要食開年飯，所以就約左三點向西貢等。之後就去街市買野，天氣咁凍就緊係打邊爐最好啦！買好晒野就去搭巴士，唔知係咪人人都去拜年呢，所以平時好多人搭既94號，今日居然無乜人！去到營地又係居然無人，唔通真係個個都去左拜年？起好營見有D肚餓，咁就煎媽媽整既羅白糕啦，新年點可以唔食羅白糕！食完糕，另外兩位遲黎既朋友仔都到左，等佢地都set好營我地就開餐囉！是日晚餐打邊爐，大家烚下烚下又食左兩個鐘。可能天氣凍，所以就決定起個營火黎取暖，我地就拿拿淋去附近執柴，之後就向燒烤爐上起火，大家一邊傾計，一邊飲酒。咁又攪到成兩點先訓。
第二朝起身，天氣仍然係咁凍，大家刷過牙洗過臉又是食早餐時。是日早餐係烘麵包加餐肉麵。因為之前行山又整親隻腳，所以無跟其他人去行山，就當我行返出去路口既時候，突然間見到有隻唔知乜動物向樓梯位跑過(都幾大隻下，感覺呢隻唔係牛，唔知係狗定野豬??????)好彩佢跑開佢無返轉頭，唔係就嚇死我！