露營@出咀記

近排負能量太多，所以要出去發洩一下。
約左十點向西貢等，最後準時既只有彼德、河生同區生，咁我地四個就邊食早餐邊等人，食完早餐就去買野(話說區生星期日生日，而我就襯佢地去惠康買野既時候就去左買個小小的birthday cake) ，等埋吉蒂、喪人細佬同童童之後就去巴士站等車，等多一陣呢個遲大到既浪子先到。之後就搭車入北潭凹出發，初段大家都行得好輕鬆，之後上大浪凹條大斜路，個個都行到死死下。上完大浪凹就落斜出咸田灣，天氣咁就當然食個冰凍既豆腐花啦！順便向度食埋個lunch，食飽飽就繼續行，行過大灣東灣後向山頂後休息下，呢排阿凡達朋友一見有石就爬，就係咁又向度玩左半個鐘至走，好彩之後既一段路都唔係好難行，只係沿住山脊行就得，最後向五點鐘去到營地，我地先扎好營，之後就去搵水源(雖然之前黎過，但真係唔記得個水源位) ，但最好笑既係向我搵緊既時候居然見到大大個箭咀指住水源既位置，所以好快就搵到，因為條水比較弱，諗住行入小小會好D，點知，一腳踏左落個泥灘度，攪到成腳都係泥，激死！就算有水都洗唔淨呀！攞完水就開始煮飯，因為今次是Solo，自己顧自己，所以就出現了貧富宴，男仔組除了喪人細佬外，個個都是罐頭加公仔麵，食完野吹左一陣水，喪人細佬就煮糖水比大家食，佢呢個自家制既蛋蛋薯粉糖水真係好好味！食完糖水洗埋碗，又是餘慶節目，就係幫壽星仔慶祝生日，最攪笑吉蒂向iphone度攪左個生日蛋糕比區生！食過蛋糕就入左去彼德個營傾計，傾傾下計唔知邊個話個天好多星星，所以個個都伸晒個頭出去睇，真係好靚，而且仲有浪子長詳既講解添！可以訓向草地上面睇星真係好正！睇睇下仲比我地見到流星！實在太有lucky喇！最後又十二點幾至返入營。
唔知係長咀呢個地方真係咁舒服，還是尋晚無返風，基本上每次去camp都訓得唔好既我，今次出奇都好訓(我去過咁多次camp都只係得三次係訓得好，其中二次居然都係長咀) ，訓醒第一件事當然就煲返煲水飯杯茶先啦！之後其他人陸陸續續咁起身，咁又開始煮早餐，上一回合輸了的男子組，今次個個向早餐度發威，最出色都還是浪子，呢個回合為佢挽回分數。因為仲要行返出去，所以食完早叔就拿拿聲執野，沿路行返出去，行到半路，阿凡達朋友們又發作，再次見石就爬。照例又玩半個鐘，之後行到咸田來個小休，最後大家一致決定行到赤徑搭船走！因為再無力爆埋條暗斜出北潭凹XD