中狗牙

石壁郊遊徑起步，上中狗牙，過一線生機，觀閻王壁，鳳凰坳拉鳳徑登鳳凰山頂，落羅漢塔出石門甲。
去完旅行返黎既第一個禮拜日就跟左喪人去行中狗牙。約左喪人細佬九點向東涌地鐵站等，先去食個早餐，之後就去巴士站等埋其他人，點知河流遲大到，等到佢十點三先黎到。向石壁水塘落車，之後就起步，開始都唔係好難行，只係天氣比較潮濕，好彩當時有風咋，唔係實焗死，越向上行條路就越斜，有D位仲要手腳一齊用先得，大約點多就上到鳳凰山頂，是日大霧到嘔，能見度可能得幾米，點解我三次上鳳凰山頂都係咁~~，以為咁既天氣，喪人應該會乖乖地由正途返東涌的，點知佢有正途唔行走去行截徑~~由鳳凰徑的另外一面落山，一條唔係正常人行既路~~行到咁上下喪人話入面有個山洞，叫我地入去睇下，呀，又估唔到向D咁既地方都有一個山洞喎！之後又帶我地去左羅漢塔，咁大霧，上到去乜鬼都睇唔到啦！最慘係之後落山既路係一條超斜的泥路，加上潮濕，就算我著住快艇都行唔到，我同域奇完完全全係”扇” 住落左成個鐘(最後問返原來個個都係用相同方法落山XD) 落完呢段山路都已經六點多，天都開始黑，但還有一段石屎路先返到出石門甲，行完呢段石屎路出到路口都己經成八點囉！好彩好快就有巴士出返東涌！唔係十點都唔知返到屋企未呀！