新春呀吱呀左摩洛哥 Day1

等左好耐既摩洛哥之旅，放工返屋企食過飯沖埋涼就拿拿淋搭車出機場，去到機場都係十點多，先去check in，之後就去食返個消夜。食完就入閘了，我地班機係十二點四起飛，本來食完飛機餐就好應該要訓覺既，但唔知點解又唔係好眼訓，唔知係咪機上面既娛樂太吸引呢，最後攪到兩點幾至訓，訓醒又差不多時間要落機，因為香港無直航機去摩洛哥，要由杜拜轉機過去摩洛哥的，終於18個鐘頭之後，摩洛哥I’m Coming~~

一落機第一件事就當然係去唱錢先啦！之後就買火車飛去今晚既目的地--馬拉喀什。坐左兩個鐘頭火車，落車時到天黑了！跟住就搭的士入古城，個古城好似一個迷宮咁，我地根本都唔知點樣去搵返我地Book既旅館，最後都要當地人幫手至搵到(當然係要比錢架啦) 放底行李就去德吉瑪廣場食我地向摩洛哥既第一餐晚餐，唔知係咪太夜定還是我地揀既呢間餐廳唔好食呢，之後行左一陣就返旅館休息。