四川之旅 Day 4

Day 4 新都橋--->高爾寺山--->剪子灣山--->理塘--->稻城

因為尋晚無電開唔到電氈睡，所以成晚都唔係訓得太好。今日師傅同我地講要攀過三個雪山先到稻城，所以大家都預到今日又係成日坐車架喇！沿路既樹木都好似著左一件白雪雪既新衫一樣。

(連樹木都換冬裝囉)
黎到呢個高爾寺山，見到四周圍都係雪，當然就要落車去玩雪啦！呢個高度已經高過我上次去雲南既白馬雪山。本來都好想訓向雪地上面同玩雪戰，可惜...........我今次無帶到手套呀！玩左兩野隻手指已經凍到唔係屬於自己。

(高爾寺山 --海拔4412m)

(D雲又白，D雪又白)

(黎到呢度，個個都停車拎相機影相啦)

(白雪中的白塔)

(幾多人向度玩雪)
玩完雪又繼續出發，我以為高爾寺山會係今次旅程既最高峰，點知唔係，今日攀過既第二個雪山---剪子彎山仲高。呵呵....唔知之後仲有冇更高呢！

(剪子彎山--海拔4659m)

(你睇個天幾近)
來到觀景台，唔知係咪因為向高海拔既地方，連個天都好似近D，伸隻手就可以摸D雲。

(海天一色)

今日又再次要入夜既時候先到達目的地，放低行李就出去食飯，就向我地行去餐館既時候。四周既人不停問我地入唔入亞丁，點解會咁？其實今次既行程我地係有諗住去亞丁既，但後尾上網收到消息話亞丁今年封山，所以唔去得。黎之前個個都預左去唔到架喇！點知加陣又有人問，就攪到大家心思思。不過我地問過幾個唔同既當地人，個個答案都唔同，有D人話要行四個鐘頭山路至去到，有D人又話可以坐車直入。都唔知邊個真？而且仲要係偷渡咁入去，所以零晨三四點就要出發。到最後，我地決定分開兩班人，佩珊兩公婆同亞琳決定偷渡入亞丁，而我，表姐同契姐就決定留向稻城。至於我點解唔偷渡入亞丁既原因，一來，我都唔知邊個係真，如果真係要我向海拔四千幾米下行四個幾鐘頭山路，我驚自己未入到亞丁就已經缺氧暈左。二來，如果真係比人捉到咁點算，你知大陸人幾唔講道理架啦！有事咁點算？而且我之前上網又睇唔到有人試過偷渡入去既情況。我寧願等佢封完山下次再來過，我知或者我會後悔，但我都係覺得安全至上。